বোকাখাতত সাংবাদিকক লৈ বিৰূপ মন্তব্য কৰা এ বি ভি পিৰ সদস্যই খুজিলে ক্ষমা
বোকাখাতৰ জে ডি এছ জি মহাবিদ্যালয়ৰ ছাত্ৰ একতা সভাৰ নিৰ্বাচনৰ পিছত সৃষ্টি হোৱা উত্তপ্ত পৰিস্থিতিৰ পিছতে এ বি ভি পিৰ এজন সদস্যই বোকাখাতৰ সাংবাদিক সকলক লৈ কৰা মন্তব্যই বোকাখাতত সাংবাদিকসকলৰ মাজত প্ৰতিক্ৰিয়াৰ সৃষ্টি কৰিছে।
এই সম্পৰ্কত বিষয়টো আলোচনা কৰিবৰ বাবে আজি বোকাখাত নাট্য মন্দিৰত এক বৈঠক অনুষ্ঠিত হয় ৷ অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱাৰ পৌৰোহিত্যত অনুষ্ঠিত উক্ত বৈঠকলৈ সাংবাদিকক লৈ বিৰূপ মন্তব্য কৰা এ বি ভি পি সদস্য গৌতম মজুমদাৰক মতা হয়।
ছাত্ৰ সংগঠনটোৰ দুজন কৰ্মকৰ্তা ক্ৰমে হিমাংশু বৰা আৰু প্ৰৱাল প্ৰিয়াংসু শইকীয়াৰ উপস্থিতিত অভিযুক্ত ছাত্ৰ গৰাকীয়ে নিজৰ দোষ স্বীকাৰ কৰি ক্ষমা বিচাৰে আৰু ভৱিষ্যতে এনে ভূল নকৰাৰ বাবে লিখিত প্ৰতিশ্ৰুতি প্ৰদান কৰে।
উল্লেখযোগ্য যে অলপতে অনুষ্ঠিত জে ডি এছ জি মহাবিদ্যালয়ৰ ছাত্ৰ একতা সভাৰ নিৰ্বাচনত সদৌ অসম ছাত্ৰ সন্থাই ৭ টা, এ বি ভি পিয়ে ৭ টা আৰু এন এছ ইউ আইয়ে ১ টা পদ দখল কৰিছিল। নৱ নিৰ্বাচিত সমিতিখনৰ সভাপতি আৰু সম্পাদকৰ পদ দুটা আছুয়ে দখল কৰে।
ইয়াৰ পিছতে একাংশ সংবাদ মাধ্যমত আছুক প্ৰাধান্য দি বাতৰি প্ৰকাশ হোৱাত এ বি ভি পি, এন এছ ইউ আই আৰু টি এম পি কেৰ সদস্যসকল ক্ষুব্ধ হৈ উঠাৰ লগতে গৌতম মজুমদাৰ নামৰ এ বি ভি পি সদস্যজনে সাংবাদিককলৈ বিৰূপ মন্তব্য কৰে।
আজিৰ বৈঠকত বোকাখাত মহকুমা সাংবাদিক সন্থা, বোকাখাত প্ৰেছ ক্লাব আৰু ইলেক্ট্ৰনিকচ মেডিয়া জাৰ্নেলিষ্ট এছ’চিয়েশ্যনৰ সমুহ সাংবাদিক উপস্থিত থাকে।