সংযুক্তা দত্তৰ ডিজাইনেৰে কৰণ সিং গ্ৰোভাৰ আৰু বিপাশা বসুৰ ৰেম্পত খোজ
অসমৰ প্ৰখ্যাত ফেশ্বন ডিজাইনাৰ তথা নিজৰ কামৰ বাবে দাদা চাহেব ফাল্কে এক্সিলেন্স এৱাৰ্ড প্ৰাপক সংযুক্তা দত্তই প্ৰস্তুত কৰা সাজপাৰ পৰিধান কৰি চলিত লেকমি ফেশ্বন উইকত ৰেম্পত খোজ দিলে বলিউডৰ অভিনেতা-অভিনেত্ৰীয়ে।
কৰণ সিং গ্ৰোভাৰ আৰু বিপাশা বসু দুয়োকে একেলগে ১৪ ফেব্ৰুৱাৰিত সংযুক্তা দত্তই ডিজাইন কৰা বিশেষ পোচাকেৰে নিজকে উপস্থাপন কৰে।
যোৱা ১১ ফেব্ৰুৱাৰিৰ পৰা “মায়ানগৰী” মুম্বাইত চলি থকা লেকমি ফেশ্বন উইকত অসমৰ ডিজাইনাৰগৰাকীৰ ডিজাইনে গুৰুত্ব লাভ কৰাটো তাৎপৰ্য্যপূৰ্ণ।
উল্লেখযোগ্য যে সংযুক্তা দত্তই বহু দিনৰ পৰা ৰাজ্যৰ পাট-মুগা বস্ত্ৰৰ নতুন নতুন ডিজাইনেৰে এইবোৰক অনন্য ধৰণে উপস্থাপন কৰাত আৰু জনপ্ৰিয় কৰাত বিশেষ ভূমিকা লৈ আহিছে।
পূৰ্বেও একাধিক বলিউড তাৰকাই দত্তই ডিজাইন কৰা পোচাকেৰে ৰেম্পত খোজ দিছে।
তাৰ ভিতৰত কৰিশ্মা কাপুৰ, চোহা আলী খান, শৰ্মিলা ঠাকুৰ আদিও আছে।
কৰিশ্মাই যোৱা বছৰ মাৰ্চত সংযুক্তা দত্তৰ ডিজাইন ‘মৰম’ৰ অসমীয়া চাদৰ-মেখেলা পিন্ধি যথেষ্ট উৎফুল্ল হৈ ৰেম্পত খোজ দিছিল।
দত্তই তেওঁৰ কামৰ স্বীকৃতিস্বৰূপে ২০১৮ চনত দাদা চাহেব ফাল্কে এক্সিলেন্স এৱাৰ্ড লাভ কৰিছিল।
ডিজাইনাৰগৰাকীৰ দীৰ্ঘদিনৰ ঐকান্তিক প্ৰয়াসে অসমৰ ঐতিহ্যপূৰ্ণ ৰেচম শিল্পৰ ক্ষেত্ৰখনক সীমাৰ পৰিধি চেৰাই সুকীয়া পৰিচিতি দিছে।