ধৰ্ষণকাণ্ডত অভিযুক্তৰ মৃত্যুদণ্ডৰ আদেশ ৰদ কৰিলে উচ্চ ন্যায়ালয়ে
সম্প্ৰতি দেশত ক্ৰমবৰ্ধমান ধৰ্ষণ কাণ্ডৰ পৰিপ্ৰেক্ষিত সামাজিক মাধ্যমত ধৰ্ষণকাৰীৰ মৃত্যুৰ দাবী উত্থাপন আহিছে। ঠিক তেনে সময়তে দেশৰ এখন উচ্চ ন্যায়ালয়ে তিনি গণ ধৰ্ষণকাৰীৰ মৃত্যুদণ্ডৰ নিৰ্দেশ ৰদ কৰিছে।
শক্তি মিল গণ ধৰ্ষণ আৰু হত্যাকাণ্ড জড়িত থকা তিনি অভিযুক্তৰ মৃত্যুৰ নিৰ্দেশ ৰদ কৰিছে বুম্বাই উচ্চ ন্যায়ালয়ে। বৃহস্পতিবাৰে বুম্বাই উচ্চ ন্যায়ালয়ৰ ন্যায়াধীশ সাধনা যাদৱ আৰু পৃথিৱাৰাজ চৱনৰ খণ্ড বিচাৰপীঠে ৰদ কৰিছে এই মৃত্যুদণ্ডৰ নিৰ্দেশ।
এই দুই ন্যায়াধীশৰ খণ্ড বিচাৰপীঠে যোৱা অক্টোবৰৰ পৰা মৃত্যুদণ্ড ৰদ সম্পৰ্কীয় এই গোচৰটোৰ শুনানি গ্ৰহণ কৰি আহিছিল।
উল্লেখ্য যে ২০১৩ চনৰ জুলাই মাহত কল চেণ্টাৰত কৰ্মৰত এগৰাকী ১৯ বছৰীয়া যুৱতীক গণধৰ্ষণ কৰি হত্যা কৰিছিল চাৰিজন লোকে। এই গণধৰ্ষণ আৰু হত্যা কাণ্ডত জড়িত থকা অপৰাধত প্ৰথমে বিজয় যাদৱ, মহম্মদ কাছিম শ্বেখ বঙালী, মহম্মজ চেলিম আৰু চিৰাজ ৰেহমানক প্ৰথমে যাৱজ্জীৱন কাৰাদণ্ড বিহা হৈছিল।
কিন্তু ২০১২ চনত সংশোধন কৰা ধৰ্ষণ সম্পৰ্কীয় আইনৰ অধীনত ২০১৪ চনত মুম্বাই মুখ্য সত্ৰ আদালতে ইয়াৰে প্ৰথম তিনিগৰাকী অভিযুক্তক মৃত্যুদণ্ড দি চতুৰ্থগৰাকীৰ যাৱজ্জীৱন কাৰাদণ্ড বাহাল ৰাখে। ইয়াৰ পিছতে অভিযুক্তকেইজন বুম্বাই উচ্চ ন্যায়ালয়ৰ দাৰস্থ হয়।
অভিযুক্তসকলৰ অধিবক্তাই বুম্বাই উচ্চ ন্যায়ালয়ত যুক্তি প্ৰদৰ্শন কৰি কয় যে ভাৰতীয় দণ্ডিবিধি আইনৰ ভুল ধাৰাত তেওঁলোকৰ মক্কেলকেইজনৰ বিচাৰ প্ৰক্ৰিয়া চলিছিল। যাৰ ফলত মুখ্য সত্ৰ ন্যায়ালয়ে অভিযুক্তকেইজনক মৃত্যুদণ্ডেৰে দণ্ডিত কৰিছিল।
অৱশ্যে বুম্বাই উচ্চ ন্যায়ালয়ে পূৰ্বতে সত্ৰ আদালতে বিহা চাৰিও গৰাকীৰ অপৰাধীৰে যাৱজ্জীৱন কাৰাদণ্ড বাহাল ৰাখিছে।