‘হিন্দু বিৰোধী অভিযোগ ভিত্তিহীন’- প্ৰাক্তন মুখ্য ন্যায়াধীশ গাভাইৰ স্পষ্টীকৰণ

ভৰ্তি আদালতৰ কক্ষত প্ৰাক্তন মুখ্য ন্যায়াধীশ বি আৰ গাভাইক লক্ষ্য কৰি জোতা নিক্ষেপ কৰা ঘটনাই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰিছিল। অলপতে এই ঘটনা সন্দৰ্ভত পুনৰবাৰ মুখ খুলি তেওঁ স্পষ্ট কৰি দিয়ে যে আদালতৰ ভিতৰত হোৱা এই আক্ৰমণে তেওঁৰ মনত কোনো নেতিবাচক প্ৰভাৱ পেলোৱা নাছিল। লগতে, তেওঁৰ বিৰুদ্ধে উত্থাপিত ‘হিন্দু বিৰোধী’ হোৱাৰ অভিযোগসমূহ পোনছাটেই নাকচ কৰি তেওঁ কয় যে হিন্দু ধৰ্মীয় আৱেগক আঘাত কৰাৰ কোনো প্ৰশ্নই নুঠে আৰু তেওঁৰ ওপৰত লগোৱা এই অভিযোগসমূহ ভিত্তিহীন।

উল্লেখ্য যে, যোৱা মাহত এক শুনানিৰ সময়ত অধিবক্তা ৰাকেশ নামৰ এজন ব্যক্তিয়ে হঠাৎ প্ৰাক্তন মুখ্য ন্যায়াধীশগৰাকীৰ ফালে জোতা নিক্ষেপ কৰিছিল আৰু পুলিচে নিয়াৰ সময়ত ‘ভাৰতত সনাতন ধৰ্মৰ অপমান সহ্য কৰা নহ’ব’ বুলি চিঞৰি প্ৰতিবাদ কৰিছিল। ধাৰণা কৰা হৈছে যে মধ্যপ্ৰদেশৰ এক ক্ষতিগ্ৰস্ত বিষ্ণু মূৰ্তি পুনৰুদ্ধাৰ সম্পৰ্কীয় এক গোচৰত ন্যায়াধীশগৰাকীয়ে দিয়া এক মন্তব্যৰ প্ৰতিক্ৰিয়া স্বৰূপে এই ঘটনা ঘটিছিল। ঘটনাৰ এসপ্তাহ পূৰ্বে তেওঁ মন্তব্য কৰিছিল, “যোৱা, ভগৱানকেই সোধাগৈ”, যিটো কথা বহুতে পৰম্পৰাৰ প্ৰতি অপমান বুলি গণ্য কৰিছিল আৰু এই আক্ৰমণৰ কাৰণ বুলি সন্দেহ কৰা হৈছিল।

ঘটনাটোৰ এমাহৰ পাছত নিজৰ স্থিতি স্পষ্ট কৰি প্ৰাক্তন মুখ্য ন্যায়াধীশগৰাকীয়ে মত প্ৰকাশ কৰে যে ন্যায় ব্যৱস্থাৰ গৌৰৱ কেৱল কাৰোবাক শাস্তি দিয়াতেই নহয়, বৰঞ্চ ক্ষমা কৰাৰ মাজতো নিহিত থাকে। নিজৰ বিবেক সম্পূৰ্ণ নিকা বুলি উল্লেখ কৰি তেওঁ কয় যে তেওঁ মন্দিৰ, মছজিদ, গুৰুদ্বাৰ আৰু গীৰ্জা আদি সকলো ধৰ্মীয় উপাসনা স্থলী দৰ্শন কৰে আৰু সকলো ধৰ্মক সমানে শ্ৰদ্ধা কৰে। তেওঁৰ পিতৃৰ দৰেই তেওঁ ধৰ্মনিৰপেক্ষতাৰ আদৰ্শ মানি চলে আৰু সেই গুণবোৰ নিজৰ জীৱনতো গ্ৰহণ কৰিবলৈ চেষ্টা কৰে বুলি তেওঁ মন্তব্য কৰে।