দৰমহাৰে নচলা হৈছে সংসাৰ; পদত্যাগ কৰিব বিচাৰিছে ব্ৰিটেইনৰ প্ৰধান মন্ত্ৰী বৰিছ জনছনে!

কম দৰমহাৰ বাবে বহুতেই কোনো চাকৰি এৰি আন চাকৰিলৈ যোৱাতো স্বাভাৱিক ঘটনা। কিন্তু এই একেই কাৰণতে যদি কোনো এখন দেশৰ প্ৰধান মন্ত্ৰীয়ে পদ এৰি যোৱাৰ কথা কয়?

শুনি আচৰিত যে লাগিলেও এইটোৱে ঘটিবলৈ গৈছে। ব্ৰিটেইনৰ প্ৰধান মন্ত্ৰী বৰিছ জনছনে এই ইচ্ছাই প্ৰকাশ কৰিছে।

দৰমহা বহুত কম। যিখিনি দৰমহা পায়, প্ৰধান মন্ত্ৰী নহ’লে তাতোকৈ অধিক ধন উপাৰ্জন কৰিব পাৰে। ইমান কম টকাৰে তেওঁ সংসাৰৰ খৰচ চলাব নোৱাৰা হৈছে।

শেহতীয়াকৈ তেওঁৰ ঘনিষ্ঠ মহলত জনছনে হেনো এনেকৈয়ে কৈছে। তাৰ লগতে পদত্যাগ কৰাৰ কথাও হেনো চিন্তা-চৰ্চা কৰিছে।

বাতৰি অনুসৰি, জনছনৰ দলৰ এগৰাকী সাংসদৰ উদ্ধৃতিৰে কোৱা হৈছে যে তেওঁ আৰু প্ৰধান মন্ত্ৰী পদত থাকিব বিচৰা নাই।

বৰ্তমান জনছনৰ বাৰ্ষিক দৰমহা হৈছে ১লাখ ৫০হাজাৰ পাউণ্ড। কিন্তু ইয়াৰ পূৰ্বে তেওঁ এখন কাকত স্তম্ভ লিখিয়েই বছৰি প্ৰায় ২ লাখ ৭৫হাজাৰ পাউণ্ড উপাৰ্জন কৰিছিল।

তদুপৰি, মাহত দুখনকৈ ছেমিনাৰত ভাষণ দি উপাৰ্জন কৰিছিল প্ৰায় ১ লাখ ৬০হাজাৰ পাউণ্ড।

সেইদৰে, প্ৰধান মন্ত্ৰী হোৱাৰ পাছৰে পৰা জনছনৰ উপাৰ্জন কমি গৈছে।

বাতৰি অনুসৰি, ল’ৰা-ছোৱালীৰ পঢ়াশুনা, পূৰ্বৰ পত্নীক ভৰণ-পোষণ দিয়াৰ বাবে প্ৰতিমাহে বহু টকা খৰচ কৰিবলগীয়া হয় জনছনে। এইবোৰ কাৰণতে তেওঁ এনে সিদ্ধান্ত লোৱা বুলি কোৱা হৈছে।

অৱশ্যে, এতিয়াই নহয়, ব্ৰেক্সিট সম্পৰ্কীয় সকলো সমস্যাৰ সমাধান তথা কৰ’না পৰিস্থিতি দূৰ হোৱাৰ পাছতে এই বিষয়ত জনছনে চূড়ান্ত সিদ্ধান্ত গ্ৰহণ কৰিব।