কাজিৰঙাৰ ইংলে পথাৰত আদিবাসী কৃষকৰ ওপৰত আৰক্ষীৰ বৰ্বৰ আক্ৰমণ : চৰকাৰক তীব্ৰ সমালোচনা ভূমি অধিকাৰ যৌথ সংগ্ৰাম সমিতিৰ
কাজিৰঙাৰ কঁহৰা হাতিখুলিস্থিত ইংলে পথাৰত পঞ্চতাৰকা হোটেল নিৰ্মাণৰ বাবে চৰকাৰে গ্ৰহণ কৰা পদক্ষেপৰ বিৰোধিতা কৰা থলুৱা আদিবাসী কৃষকৰ ওপৰত আৰক্ষীয়ে চলোৱা বৰ্বৰ আক্ৰমণক তীব্ৰ ভাষাৰে গৰিহণা জনাইছে ভূমি অধিকাৰ যৌথ সংগ্ৰাম সমিতি, অসমে। পুঁজিপতি গোষ্ঠী ‘হায়াট’ৰ (Hyatt Hotels and Resorts) স্বাৰ্থত চৰকাৰে সাধাৰণ ৰাইজৰ ওপৰত চৰম অত্যাচাৰ চলোৱা বুলি সমিতিয়ে অভিযোগ উত্থাপন কৰিছে।
এক প্ৰেছ বিবৃতিযোগে সমিতিৰ আহ্বায়ক কৃষ্ণ গগৈ আৰু সুব্রত তালুকদাৰে জনায় যে, ২৮ জুন তাৰিখে ইংলে পথাৰত হোটেলৰ বাবে চিহ্নিত স্থানত আৰক্ষীয়ে সশস্ত্ৰ বাহিনী মোতায়ন কৰি কৃষকসকলৰ স্বাভাৱিক যাতায়াত বন্ধ কৰি দিছিল। যুগ যুগ ধৰি নিজৰ মাটিত খেতি কৰি অহা কৃষকসকলে ইয়াৰ বিৰোধিতা কৰি নিজৰ ভূমিত প্ৰৱেশ কৰিবলৈ চেষ্টা কৰোতেই আৰক্ষীয়ে তেওঁলোকৰ ওপৰত নিৰ্মমভাৱে বলপ্ৰয়োগ কৰে। আৰক্ষীৰ এই আক্ৰমণত কেইবাজনো লোক গুৰুতৰভাৱে আহত হোৱাৰ লগতে ৰশ্মি গোৱালা নামৰ এগৰাকী যুৱতীক সংকটজনক অৱস্থাত চিকিৎসালয়ত ভৰ্তি কৰোৱা হয়।
সমিতিয়ে জানিবলৈ দিয়া মতে, ভুক্তভোগী ৪৫ টা পৰিয়ালৰ ভূমিৰ ৰেকৰ্ড আৰু নথি-পত্ৰই প্ৰমাণ কৰে যে তেওঁলোকে তিনি প্ৰজন্মতকৈও অধিক সময় ধৰি সেই মাটিত খেতি কৰি আহিছে। এই আইনী দখলৰ সকলো তথ্য-প্ৰমাণ গোলাঘাট জিলা প্ৰশাসনক অৱগত কৰাৰ পিছতো কৃষকসকলক মাটিৰ ম্যাদি পট্টা প্ৰদান কৰাৰ পৰিৱৰ্তে অভিজাত হোটেল গোষ্ঠীৰ হাতত উক্ত ভূমি তুলি দিবলৈ চৰকাৰে ষড়যন্ত্ৰ ৰচিছে।
এই ঘটনাক থলুৱা ৰাইজৰ মৌলিক আৰু সাংবিধানিক অধিকাৰৰ ওপৰত চৰম আঘাত বুলি অভিহিত কৰি সমিতিয়ে তিনিটাকৈ স্পষ্ট দাবী উত্থাপন কৰিছে। প্ৰথম দাবীটো হৈছে, ‘হায়াট’ বা অন্য কোনো বহুজাতিক হোটেল গোষ্ঠীক কৃষকৰ ভূমি হস্তান্তৰ কৰাৰ সিদ্ধান্ত চৰকাৰে ততালিকে বাতিল কৰিব লাগিব। দ্বিতীয়তে, কৰ্প’ৰেটৰ স্বাৰ্থত থলুৱা জনসাধাৰণক উচ্ছেদ কৰিবলৈ চলোৱা চৰকাৰী বলপ্ৰয়োগ আৰু পুলিচী সন্ত্ৰাস অনতিপলমে বন্ধ কৰিব লাগিব। সমিতিৰ তৃতীয়টো দাবী হৈছে, যুগ যুগ ধৰি খেতি কৰি অহা ইংলে পথাৰৰ প্ৰতিটো কৃষক পৰিয়ালক চৰকাৰে অতি শীঘ্ৰে ভূমিৰ স্থায়ী ম্যাদি পট্টা আৰু ন্যায্য অধিকাৰ প্ৰদান কৰিব লাগিব।
ভূমিৰ অধিকাৰ সুৰক্ষিত কৰাৰ এই যুঁজত সমিতিয়ে আদিবাসী কৃষক সমাজৰ সৈতে সদায় থিয় দিয়াৰ কথা স্পষ্ট কৰি দি চৰকাৰক অনতিপলমে এই দমনমূলক স্থিতি আৰু কৰ্প’ৰেটমুখী নীতি সলনি কৰিবলৈ আহ্বান জনাইছে।