BSF-ৰ হাতত নিহত ভাৰতৰ সীমাত প্ৰৱেশ কৰিব খোজা দুজন পাকিস্তানী অনুপ্ৰৱেশকাৰী

প্ৰতিৱেশী ৰাষ্ট্ৰ পাকিস্তানৰ পৰা অবৈধভাৱে ভাৰতৰ সীমাত প্ৰৱেশ কৰিব খোজা দুজন অনুপ্ৰৱেশকাৰী আজি সীমান্ত সুৰক্ষা বাহিনী (বি এছ এফ)ৰ হাতত নিহত হয়।

জানিব পৰা মতে, সীপাৰৰ দেশৰ দুজন অনুপ্ৰৱেশকাৰীয়ে অমৃতসৰৰ সমীপত থকা আতাৰীৰ আন্তঃৰাষ্ট্ৰীয় সীমাৰ কাটা তাঁৰ পাৰ হৈ ভাৰতত প্ৰৱেশ কৰাৰ চেষ্টা চলাই থাকোতেই ভাৰতৰ জোৱানে অভিযান চলাই দুয়োজনকে মাৰিবলৈ সক্ষম হয়।

অনুপ্ৰৱেশকাৰী দুজন পাকিস্তানৰ বুলি নিশ্চিতি প্ৰদান কৰিছে সীমান্ত সুৰক্ষা বাহিনীয়ে।

এই ঘটনা সংঘটিত হোৱাৰ পিছতেই বি এছ এফ আৰু আৰক্ষীৰ শীৰ্ষ পৰ্যায়ৰ বিষয়া ঘটনাস্থলত উপস্থিত হৈ পৰিস্থিতিৰ বুজ লৈছে।

শীৰ্ষ বিষয়া সকলে ঘটনা সংঘটিত হোৱা স্থানত অস্ত্ৰ-শস্ত্ৰ থাকিব পাৰে বুলি আশংকা প্ৰকাশ কৰি সমগ্ৰ অঞ্চলটোতে সুৰক্ষা কটকটীয়া কৰি তুলিছে।

জানিব পৰা মতে, আজি ৰাতিপুৱা বি এছ এফে সীমান্তত সীপাৰৰ পৰা অহা দুজন অনুপ্ৰৱেশকাৰীয়ে ভাৰতত প্ৰৱেশ কৰাৰ বাবে চেষ্টা চলাই থকা দেখে।

লগে লগে বি এছ এফৰ দলটোৱে অনুপ্ৰৱেশকাৰী দুজনক বাধা প্ৰদান কৰে যদিও তেওঁলোকে গুৰুত্ব প্ৰদান নকৰাত গুলী চলাবলৈ বাধ্য হয়।

বি এছ এফৰ গুলীত থিতাতে নিহয় হয় অনুপ্ৰৱেশকাৰী দুজন।

অনুপ্ৰৱেশকাৰী দুজনৰ পৰা এটা এ কে-৪৭ জব্দ কৰে সুৰক্ষা বাহিনীয়ে।

বৰ্তমান দুয়োজন অনুপ্ৰৱেশকাৰীৰ মৃতদেহ মৰণোত্তৰ পৰীক্ষাৰ ব্যৱস্থা কৰি থকা হৈছে বুলি জানিব পৰা গৈছে।

উল্লেখ্য যে আজিৰ পৰা দুদিন পূৰ্বে ড্ৰোণৰ সহায়ত দুজন যুৱকক আটক কৰিছিল সুৰক্ষা বাহিনীয়ে।