কঠুৱাত বিএছএফে গুলীয়াই ভূপতিত কৰিলে পাকিস্তানী চোৰাংচোৱাৰ ড্ৰোণ

জম্মু-কাশ্মীৰৰ কঠুৱাৰ আন্ত:ৰাষ্ট্ৰীয় সীমান্তত সীমান্ত সুৰক্ষা বাহিনী (বিএছএফ)ৰ জোৱানে শনিবাৰে পুৱা পাকিস্তানী চোৰাংচোৱাৰ এখন ড্ৰোণ গুলীয়াই ভূপতিত কৰে।

বাতৰি অনুসৰি, বিএছএফৰ দলটোৱে কঠুৱাৰ হীৰানগৰ ছেক্টৰৰ ৰথুৱা অঞ্চলত ড্ৰোণখন উৰি থকা দেখা পাই গুলীয়াই ভূপতিত কৰে।

বিএছএফৰ জোৱানসকলে পাকিস্তানৰ ড্ৰোণখন গুলীওলাৰ পাছত সেইখন থেতিপথাৰত পৰে। জোৱানসকলে ড্ৰোণখনৰ ভিতৰত থকা অস্ত্ৰ-শস্ত্ৰসমূহ জব্দ কৰে।

পাক ৰেঞ্জাৰ্ছ আৰু পাকিস্তানী সেনাই এনেকুৱা ড্ৰোণৰ ব্যৱহাৰ কৰি ভাৰতীয় সুৰক্ষা বাহিনীৰ অৱস্থানৰ তথ্য সংগ্ৰহ কৰে যাতে সন্ত্ৰাসবাদীসকলক ভাৰতলৈ প্ৰেৰণ কৰিব পাৰে।

উল্লেখযোগ্য যে হীৰানগৰ অঞ্চল সদায়েই পাকিস্তানী সন্ত্ৰাসবাদীৰ অনুপ্ৰৱেশৰ ক্ষেত্ৰ হিচাপে পৰিগণিত হৈ আহিছে।

ইপিনে, চীন সীমান্তত ভাৰত-চীনৰ মাজত উত্তেজনা অব্যাহত থকাৰ মাজতে পাকিস্তানেও ভাৰতত অস্থিৰতাৰ সৃষ্টি কৰাৰ প্ৰয়াস চলোৱাৰ সম্ভাৱনা দেখা গৈছে।

চীনৰ প্ৰৰোচনাতে পাকিস্তানে দীৰ্ঘদিন ধৰি ভাৰতৰ বিৰুদ্ধে এখন অঘোষিত যুদ্ধ চলাই অহাৰো অভিযোগ উত্থাপিত হৈ আহিছে।