ওদালগুৰিত সুধাকণ্ঠ ড০ ভূপেন হাজৰিকাৰ প্ৰতিমূৰ্তি উন্মোচন হাগ্ৰামা মহিলাৰীৰ

অসমত শান্তিৰ পৰিৱেশ ঘূৰাই অনাত মধ্যস্থতাকাৰীৰ ভূমিকা ল’বলৈ অসম সাহিত্য সভাৰ সভাপতি ড০ পৰমানন্দ ৰাজংশীয়ে বিটিচিৰ প্ৰধান হাগ্ৰামা মহিলাৰীক আহ্বান জনায়।

ওদালগুৰিত সুধাকণ্ঠ ড০ ভূপেন হাজৰিকাৰ প্ৰতিমূৰ্তি উন্মোচন কৰিবলৈ আহি উপস্থিত সাহিত্যিক, শিল্পী আৰু সাধাৰণ জনতাৰ এখন সভাত ভাষণ দি ড০ ৰাজবংশীয়ে বৰ্তমান সাহিত্য সভাত হোৱা পুঁজিৰ সংকট আৰু ৰাজ্য চৰকাৰে পুঁজি মোকোলাই দিয়াত হোৱা বিলম্বৰ সন্দৰ্ভত নিজৰ অসন্তুষ্টি ব্যক্ত কৰে।

সভাত ভাষণ দি বিটিচি প্ৰধান মহিলাৰীয়ে কৈছে যে বিটিচি কৰ্তৃপক্ষই ইয়াত বাস কৰা সমূহ সম্প্ৰদায়ৰ সৰ্বাংগীন উন্নতি আৰু কল্যাণৰ বাবে সকলো কাম কৰিবলৈ দায়বদ্ধ। সুধাকণ্ঠ হাজৰিকাৰ প্ৰতিমূৰ্তি উন্মোচন কৰি তেওঁ আৰু কয় যে বিটিচি চৰকাৰে বিচিএডিৰ  অন্তৰ্গত কোকৰাঝাৰ, বাকছা আৰু চিৰাং জিলাত সুধাকণ্ঠৰ ৩টা মূৰ্তি স্থাপন কৰিব।

এই সভাত সুধাকণ্ঠৰ ভাতৃ সমৰ হাজৰিকা, তামুলপুৰৰ বিধায়ক ইমানুৱেল মোচাহাৰী, মাজবাটৰ বিধায়ক চৰণ বড়ো, ভৈৰবকুণ্ডৰ এমচিএলএ ৰিপেন দৈমাৰী আৰু ওদালগুৰিৰ উপায়ুক্ত দিলীপ কুমাৰ দাস উপস্থিত থাকে। সভাত সুধাকণ্ঠৰ প্ৰতিমূৰ্তি নিৰ্মাণ কৰা ভাস্কৰ বীৰেন সিনহায়ো ভাষণ প্ৰদান কৰে।

সুধাকণ্ঠৰ প্ৰতিমূৰ্তি উন্মোচনী অনুষ্ঠানত কেবিনেট মন্ত্ৰী ৰিহন দৈমাৰীয়ে এখন স্মৃতিগ্ৰন্থ উন্মোচন কৰে। এই অনুষ্ঠানতেই বিটিচি প্ৰধানগৰাকীয়ে ওদালগুৰিত এটা নৱনিৰ্মিত গোৰ্খা হোষ্টেল উদ্বোধন কৰে। লগতে তেওঁ ওদালগুৰিৰ দৈনিক বজাৰত এটা ১৮.৫৯ কোটি টকা ব্যয়সাপেক্ষ সৰ্বাধুনিক ব্যৱসায় কেন্দ্ৰৰ আধাৰশিলা স্থাপন কৰে।

উক্ত অনুষ্ঠানৰ পাছত পাচত বিটিচি প্ৰধানগৰাকী সপ্তম ভৈৰবকুণ্ড পৰ্যটন মহোৎসৱত মুখ্য অতিথি হিচাপে উপস্থিত থাকে। তেওঁ ভৈৰবকুণ্ডক অতি শীঘ্ৰেই এটা পৰ্যটনক্ষেত্ৰ হিচাপে গঢ়ি তোলাৰ ক্ষেত্ৰত বিটিচি চৰকাৰৰ প্ৰতিশ্ৰুতিবদ্ধতাৰ বিতংকৈ প্ৰকাশ কৰে।