বিটিচিৰ কাৰ্যবাহী পৰিষদৰ সম্প্ৰসাৰণত ৰাজ্যপালৰ অনুমোদন: ১৪ গৰাকীৰ পৰা ১৭ গৰাকীলৈ বৃদ্ধি সদস্যৰ সংখ্যা

বিটিচিৰ প্ৰশাসনিক কাম-কাজ পৰিচালনাৰ সুবিধাৰ্থে হাগ্ৰামা মহিলাৰী নেতৃত্বাধীন বড়োলেণ্ড টেৰিটৰিয়েল কাউন্সিলৰ (বিটিচি) কাৰ্যবাহী পৰিষদৰ সম্প্ৰসাৰণত আনুষ্ঠানিক অনুমোদন জনাইছে অসমৰ ৰাজ্যপালে। এই প্ৰশাসনিক সালসলনিৰ পিছত পৰিষদৰ কাৰ্যবাহী সদস্যৰ সংখ্যা ১৪ গৰাকীৰ পৰিৱৰ্তে ১৭ গৰাকীলৈ বৃদ্ধি পালে।

যোৱা ৩ মাৰ্চত অসম ৰাজ্যপালৰ কাৰ্যালয়ৰ পৰা জাৰি কৰা এক চৰকাৰী নিৰ্দেশনা অনুসৰি, বিটিচিৰ মুখ্য কাৰ্যবাহী সদস্য হাগ্ৰামা মহিলাৰীয়ে যোৱা ২৭ ফেব্ৰুৱাৰীত কৰা এক আনুষ্ঠানিক অনুৰোধৰ ভিত্তিত এই সম্প্ৰসাৰণত অনুমোদন জনোৱা হৈছে। কাৰ্যবাহী সদস্য হিচাপে নতুনকৈ অন্তৰ্ভুক্ত হোৱা তিনিগৰাকী পৰিষদীয় সদস্য হ’ল ক্ৰমে— ৩০ নং গোৰেশ্বৰ জনজাতি সংৰক্ষিত সমষ্টিৰ মহেশ্বৰ বসুমতাৰী, ২৭ নং নাগ্ৰীজুলি অসংৰক্ষিত সমষ্টিৰ লখী দাস আৰু চৰকাৰৰ দ্বাৰা মনোনীত সদস্য কৰ্মেশ্বৰ ৰায়। এই তিনিগৰাকী সদস্যৰ অন্তৰ্ভুক্তিৰ লগে লগে কাৰ্যবাহী পৰিষদৰ শক্তি আনুষ্ঠানিকভাৱে ১৭ জনলৈ নিৰ্ধাৰণ কৰা হ’ল।

ৰাজ্যপালগৰাকীয়ে নতুনকৈ নিযুক্তি পোৱা এই তিনিওগৰাকী কাৰ্যবাহী সদস্যৰ পদ আৰু গোপনীয়তাৰ শপতগ্ৰহণ অনুষ্ঠানৰ বাবেও অনুমোদন প্ৰদান কৰিছে। নিৰ্ধাৰিত প্ৰক্ৰিয়া অনুসৰি, অহা ৬ বা ৭ মাৰ্চত কোকৰাঝাৰত এই শপতগ্ৰহণ অনুষ্ঠান অনুষ্ঠিত হ’ব। অসম চৰকাৰৰ অতিৰিক্ত মুখ্য সচিব তথা বিটিচিৰ প্ৰধান সচিবৰ দায়িত্বত থকা জ্যেষ্ঠ প্ৰশাসনিক বিষয়া মুকেশ চন্দ্ৰ সাহুক নতুন সদস্যসকলক শপতবাক্য পাঠ কৰোৱাবলৈ মনোনীত কৰা হৈছে।

অসম চৰকাৰৰ অতিৰিক্ত সচিব বিদিত দাসে জাৰি কৰা এই চৰকাৰী পত্ৰৱলী ইতিমধ্যে প্ৰয়োজনীয় ব্যৱস্থা গ্ৰহণৰ বাবে ৰাজ্যৰ মুখ্য সচিব, আৰক্ষী সঞ্চালকপ্ৰধান, মুখ্যমন্ত্ৰীৰ কাৰ্যালয় আৰু বড়োলেণ্ড কল্যাণ বিভাগলৈ প্ৰেৰণ কৰা হৈছে। পৰৱৰ্তী কাৰ্যপন্থাৰ পূৰ্বে হাগ্ৰামা মহিলাৰী নেতৃত্বাধীন পৰিষদখনৰ এই সম্প্ৰসাৰণক এক গুৰুত্বপূৰ্ণ প্ৰশাসনিক সালসলনি হিচাপে গণ্য কৰা হৈছে।