ৰঞ্জন দৈমাৰীৰ যাৱজ্জীৱন কাৰাদণ্ডৰ ৰায়দান সন্দৰ্ভত প্ৰতিক্ৰিয়া বিটিআৰ প্ৰধান প্ৰমোদ বড়োৰ

অভিশপ্ত ৩০ অক্টোৱৰৰ ধাৰাবাহিক বোমা বিস্ফোৰণৰ মুল অভিযুক্ত ৰঞ্জন দৈমাৰীক আজি মহামান্য গুৱাহাটী উচ্চ ন্যায়ালয়ে যাৱজ্জীৱন কাৰাদণ্ডৰ আদেশ  বিহা ঘটনাই বিটিআৰত তুমুল প্ৰতিক্ৰিয়াৰ সৃষ্টি কৰিছে ৷

বিটিআৰ প্ৰধান প্ৰমোদ বড়োই আজি সাংবাদিকৰ আগত ৰঞ্জন দৈমাৰীৰ ৰায়দানকলৈ প্ৰতিক্ৰিয়া ব্যক্ত কৰি কয়, ‘’আমি আশা কৰিছিলো এটা যোগাত্মক খবৰ আহিব ৷ যিহেতু এটা শান্তি প্ৰক্ৰিয়াত জড়িত হৈছিল ৰঞ্জন দৈমাৰী ৷ এইক্ষেত্ৰত মহামান্য আদালতৰ শাস্তিৰ ৰায়কলৈ অসম চৰকাৰৰ সতে কথা পাতিম।‘’

‘’আমি বিচাৰো ৰঞ্জন দৈমাৰী মুকলি আকাশৰ তলত আহক আৰু সমাজৰ লগত থাকি কাম কৰক ৷ ইয়াৰ বাবে শান্তি চুক্তি স্বাক্ষৰকাৰী ৰঞ্জন দৈমাৰীক মুকলি আকাশৰ তলত অনাৰ বাবে অসম চৰকাৰ আৰু কেন্দ্ৰীয় চৰকাৰৰ সতে আলোচনা কৰিম,’’-প্ৰমোদ বড়োৱে কয় ৷

তেওঁ লগতে আৰু কয় যে আদালত বেলেগ বিষয় আৰু শান্তি প্ৰক্ৰিয়া বেলেগ বিষয়৷ গতিকে ন্যায়পালিকাই ন্যায়পালিকাৰ কাম কৰি যাব আৰু আমি চৰকাৰৰ সতে বহি আইনী প্ৰক্ৰিয়াৰ সমাধান কেনেকৈ কৰা যায় তাৰ বাবে কাম কৰিম বুলি উল্লেখ কৰে বড়োৱে ৷

ইপিনে, এনডিএফবিৰ প্ৰতিষ্ঠাপক সভাপতি ৰঞ্জন দৈমাৰীক যাবজ্জীৱন কাৰাদণ্ড বিহাক লৈ দুখিত প্ৰাক্তন এনডিএফবিৰ(প্ৰ)ৰ সভাপতি তথা বিটিআৰ উপ-মুখ্য কাৰ্যৱাহী গোবিন্দ চন্দ্ৰ বসুমতাৰী ৷ তেওঁ কয় যে আশাকৰা ধৰণে ৰায় নহ’ল ৷ তথাপিও ৰঞ্জন দৈমাৰীৰ শাস্তি লাঘবৰ আলোচনা কৰা হ’ব বুলি কয় বসুমতাৰীয়ে।

সেইদৰে, প্ৰতিক্ৰিয়া প্ৰকাশ কৰিছে বিটিআৰৰ কাৰ্যবাহী সদস্য তথা প্ৰাক্তন এনডিএফবিৰ (এছ) সাধাৰণ সম্পাদক ৰঞ্জিত বসুমতাৰীয়ে ৷ বসুমতাৰীৰ ভাষ্য আমি কেতিয়াও এনেকুৱা ৰায় আশা কৰা নাছিলোঁ ৷