সৰভোগ সমষ্টিৰ বাবে আজি মনোনয়ন পত্ৰ দাখিল কৰিলে মহাজোঁটৰ প্ৰাৰ্থী মনোৰঞ্জন তালুকদাৰে

কেইবা হাজাৰ সমৰ্থক লগতলৈ সৰভোগ সমষ্টিৰ বাবে আজি বৰপেটাত মনোনয়ন পত্ৰ দাখিল কৰে চি পি আই (এম)-কংগ্ৰেছ-বিপিএফ- এ আই ইউ ডি এফৰ মহাজোঁটৰ প্ৰাৰ্থী মনোৰঞ্জন তালুকদাৰে ৷

বৰপেটা জিলাৰ বিভিন্ন প্ৰান্তৰ পৰা অহা চি পি আই (এম)-কংগ্ৰেছ-বিপিএফ আৰু এ আই ইউ ডি এফ দলৰ নেতা কৰ্মীসকলে প্ৰথমে বৰপেটা পৌৰসভাৰ খেলপথাৰত সমবেত হয় ৷

ইয়াৰ পিছতে সমৰ্থকসকলে মনোৰঞ্জন তালুকদাৰক জিলা উপায়ুক্তৰ কাৰ্যালয়লৈ আদৰি আনে।

পিছত সৰভোগৰ ৰিটাৰ্নিং বিষয়াৰ ওচৰত মনোনয়ন পত্ৰ দাখিল কৰে মহাজোঁটৰ প্ৰাৰ্থী মনোৰঞ্জন তালুকদাৰে ৷ ইয়াৰ পূৰ্বে সাংবাদিকৰ আগত কিছু মন্তব্য দাঙি ধৰে মনোৰঞ্জন তালুকদাৰে ৷

বিজেপিৰ ৰাজ্যিক সভাপতি ৰনজিৎ কুমাৰ দাসে এইবাৰ সৰভোগৰ পৰা প্ৰতিদ্বন্দ্বিতা আগবঢ়ালে ভাল আছিল বুলিও তীৰ্যক মন্তব্য কৰে বাঁওপন্থী নেতাগৰাকীয়ে।

উল্লেখ্য যে, সৰভোগৰ বৰ্তমানৰ বিধায়ক তথা ৰাজ্যিক বিজেপিৰ সভাপতি ৰণজিৎ দাসে এইবাৰ সৰভোগ সমষ্টিৰ পৰিবৰ্তে পাটাছাৰকুছিত প্ৰতিদ্বন্দ্বিতা আগবঢ়োৱাত এইবাৰ ৰাজনৈতিক মহলৰ দৃষ্টি নিবন্ধ হৈছে সৰভোগ সমষ্টি ৷