নাছিকত ভুৱা এমাজন টেক ছাপৰ্ট চেণ্টাৰ উন্মোচন: চিবিআইৰ অভিযানত ৫ জন গ্ৰেপ্তাৰ, কোটি কোটি টকাৰ সম্পত্তি জব্দ

মহাৰাষ্ট্ৰৰ নাছিকত চলি থকা এক ভুৱা এমাজন টেক ছাপৰ্ট চেণ্টাৰক উন্মোচন কৰিছে কেন্দ্ৰীয় অনুসন্ধান সংস্থা চিবিআইয়ে। অভিযোগ অনুসৰি এই টেক চাপৰ্ট চেণ্টাৰটোৱে আমেৰিকা আৰু কানাডাৰ নাগৰিকসকলক প্ৰতাৰণা কৰি আহিছে। জানিব পৰা মতে মুম্বাইৰ ছজন ব্যক্তিৰ এটা দলে চলোৱা এই চাইবাৰ অপৰাধী নেটৱৰ্কত ৬০ জন অপাৰেটৰ জড়িত আছিল, যিসকলে ফিছিং কলৰ জৰিয়তে লক্ষ লক্ষ টকা হাত শৰাধ কৰিছিল।

চিবিআইৰ সূত্ৰ অনুসৰি, নাছিকৰ ইগাটপুৰীত অৱস্থিত ৰেইন ফৰেষ্ট ৰিজ’ৰ্টত এই ভুৱা কল চেণ্টাৰ স্থাপন কৰা হৈছিল। অপৰাধীসকলে নিজকে এমাজনৰ ছাপৰ্ট চাৰ্ভিচৰ কৰ্মচাৰী বুলি পৰিচয় দি বিদেশী নাগৰিকসকলক ফোন কৰিছিল আৰু তেওঁলোকক প্ৰতাৰণা কৰিছিল। এই আঁচনিত অচিনাক্ত বেংকৰ বিষয়া আৰু গিফ্ট কাৰ্ড আৰু ক্ৰিপ্টোকাৰেন্সীৰ জৰিয়তে ধন সংগ্ৰহ কৰিছিল। চাইবাৰ অপৰাধীসকলে এক সংগঠিত ব্যৱস্থা ব্যৱহাৰ কৰিছিল, য’ত ৬০ জন অপাৰেটৰে কলাৰ, ভেৰিফায়াৰ আৰু ক্ল’জাৰ হিচাপে কাম কৰিছিল।

অভিযানৰ সময়ত চিবিআইয়ে প্ৰতাৰণাত সক্ৰিয়ভাৱে জড়িত ৬২ জন কৰ্মচাৰীক আটক কৰে।

চিবিআইৰ মুখপাত্ৰই কয় যে, “অভিযুক্তসকলে এমাজনৰ সহায়ক কৰ্মচাৰীৰ ৰূপ লৈ অবৈধ কল চেণ্টাৰৰ পৰা প্ৰতাৰণামূলক ফোন কৰি আৰ্থিক প্ৰৱঞ্চনাৰ ষড়যন্ত্ৰ কৰিছিল। এই অভিযানত আমি বৃহৎ পৰিমাণৰ প্ৰমাণ সংগ্ৰহ কৰিছোঁ।”

অভিযানত চিবিআইয়ে ৪৪টা লেপটপ আৰু ৭১টা মোবাইল ফোনকে ধৰি ডিজিটেল আৰু ভৌতিক প্ৰমাণ জব্দ কৰে। ইয়াৰ উপৰিও ১.২০ কোটি টকাৰ হিচাপহীন নগদ ধন, ৫০০ গ্ৰাম সোণ, ১ কোটি টকাকৈ সাতখন বিলাসী গাড়ী, প্ৰায় ৫,০০০ ডলাৰৰ ক্ৰিপ্টোকাৰেন্সী লেনদেন, আৰু ২০০০ কানাডিয়ান ডলাৰ (প্ৰায় ১.২৬ লাখ টকা) মূল্যৰ গিফ্ট ভাউচাৰ উদ্ধাৰ কৰে।