১০০ কোটি সংগ্ৰহৰ নির্দেশ কাণ্ড : মহাৰাষ্ট্ৰৰ প্ৰাক্তন গৃহমন্ত্ৰী অনিল দেশমুখৰ দুই সহযোগীক জেৰা চিবিআইৰ

মুম্বাইৰ আৰক্ষীক মাহে ১০০ কোটি টকা সংগ্ৰহৰ নিৰ্দেশ দিয়া বুলি প্ৰাক্তন মুম্বাই আৰক্ষী আয়ুক্ত পৰম বীৰ সিঙে উত্থাপন কৰা গুৰুতৰ অভিযোগে মহাৰাষ্ট্ৰৰ প্ৰাক্তন গৃহমন্ত্ৰী তথা এনচিপিৰ নেতা অনিল দেশমুখৰ ৰাজনৈতিক কেৰিয়ালৈ সংকট নমাই আনিছে।

প্ৰাক্তন মুম্বাই আৰক্ষী আয়ুক্ত পৰম বীৰ সিঙে উত্থাপন কৰা এই দুৰ্নীতিৰ অভিযোগৰ পিছতে গৃহ মন্ত্ৰীত্ব হেৰুওৱা অনিল দেশমুখৰ দুই সহযোগীক চিবিআই-এ জেৰা আৰম্ভ কৰিছে।

দেওবাৰে অনিল দেশমুখৰ ব্যক্তিগত সহযোগী কুন্দন সিন্ধে আৰু ব্যক্তিগত সচিব সঞ্জীৱ পালাণ্ডেক চিবিআইৰ এটা দলে উক্ত অভিযোগ সন্দৰ্ভত প্ৰাথমিক পৰ্যায়ৰ তদন্তৰ বাবে সোধা পোচা কৰা বুলি চিবিআইৰ বিষয়াই সংবাদ মাধ্যমক জনাইছে।

চিবিআই-এ বুম্বাই উচ্চ ন্যায়ালয়ৰ নিৰ্দেশ অনুসৰি প্ৰাক্তন গৃহমন্ত্ৰী অনিল দেশমুখৰ দুই সহযোগীক তদন্তকাৰী বিষয়াৰ দলটোৰ সন্মুখত থিয় হ’বলৈ নিৰ্দেশ দিছিল।

তেওঁলোক দুয়োকে চিবিআইয়ে উপনগৰীয় ছাণ্টাক্ৰুজৰ ডিআৰডিঅ’ অতিথিশালাত সোধা-পোছা কৰে।

উল্লেখ্য পৰম বীৰ সিঙে মুখ্যমন্ত্ৰীলৈ প্ৰেৰণ কৰা এখন পত্ৰত অভিযোগ কৰিছিল যে প্ৰাক্তন গৃহমন্ত্ৰী অনিল দেশমুখে নিলম্বিত আৰক্ষী শচীন ৱাজেক মুম্বাইৰ বাৰ আৰু ৰেষ্টুৰেণ্টৰ পৰা মাহে ১০০ কোটি অধিক ধন দাবী কৰিবলৈ কোৱাৰ সময়ত পালাণ্ডে উপস্থিত আছিল।

আনহাতে উদ্যোগপতি মুকেশ আম্বানিৰ বাসগৃহৰ সন্মুখত বিস্ফোৰক ভৰ্তি বাহন উদ্ধাৰ কাণ্ডত জড়িত থকাৰ অভিযোগত শচীন ৱাজক ইতিমধ্যে NIAএ গ্ৰেপ্তাৰ কৰিছে।