প্ৰাক্তন মুখ্য ন্যায়াধীশ ৰঞ্জন গগৈলৈ ‘জেদ+’ ভি আই পি নিৰাপত্তা

উচ্চতম ন্যায়ালয়ৰ প্ৰাক্তন মুখ্য ন্যায়াধীশ তথা বৰ্তমানৰ ৰাজ্যসভাৰ সাংসদ ৰঞ্জন গগৈলৈ ‘জেদ+’ ভি আই পি নিৰাপত্তা আগবঢ়াইছে কেন্দ্ৰীয় চৰকাৰে।

দেশৰ প্ৰাক্তন মুখ্য ন্যায়াধীশ তথা অসম সন্তান ৰঞ্জন গগৈয়ে এতিয়াৰে পৰা দেশৰ যিকোনো প্ৰান্তত ভ্ৰমণ কৰিলে ‘জেদ+’ ভি আই পি নিৰাপত্তা ব্যৱস্থা লাভ কৰিব।

দেশৰ যিকোনো প্ৰান্তলৈ ৰঞ্জন গগৈয়ে ভ্ৰমণ কৰিলে কেন্দ্ৰীয় সংৰক্ষিত আৰক্ষী বাহিনীৰ বিশেষ কামাণ্ডোৱে গগৈক নিৰাপত্তা প্ৰদান কৰিব।

ৰঞ্জন গগৈয়ে ২০১৯ বৰ্ষৰ নৱেম্বৰ মাহত উচ্চতম ন্যায়ালয়ৰ মুখ্য ন্যায়াধীশ পদৰ পৰা অৱসৰ গ্ৰহণ কৰিছিল আৰু পৰৱৰ্তী সময়ত ৰাজ্যসভালৈ নিৰ্বাচিত হৈছিল।

দীৰ্ঘ বিবাদিত ৰাম জন্মভূমি গোচৰৰ ৰায়দান, ৰাফেল সন্দৰ্ভত ৰায়দান মুখ্য ন্যায়াধীশ ৰঞ্জন গগৈৰ দিনৰ উল্লেখযোগ্য ৰায়দান।

জানিব পৰা মতে, অস্ত্ৰ সজ্জিত ৮-১২ জনীয়া চি আৰ পি এফৰ কামাণ্ডোৰ দলে প্ৰাক্তন মুখ্য ন্যায়াধীশ গৰাকীৰ ভ্ৰমণৰ সময়ত সুৰক্ষা প্ৰদান কৰাৰ লগতে তেওঁৰ বাসগৃহতো একে ধৰণৰ কামাণ্ডোৰ দলে নিৰাপত্তা প্ৰদান কৰিব।