কৰ’না ৰিপ’ৰ্ট পজিটিভ আহিলেই পঠাব লাগিব জিন’ম ছিকুৱেন্সিঙৰ বাবে; ৰাজ্যসমূহক নিৰ্দেশ কেন্দ্ৰৰ

বছৰৰ শেষত পুনৰ বৃদ্ধি পাইছে কৰ’না। আতংক ঘূৰি আহিছে। এইবাৰ চিন্তাৰ কাৰণ হৈছে কৰ’না জে এন ১ (JN.1) ভেৰিয়েন্ট। এই ভেৰিয়েন্ট অতি সোনকালে বিয়পে। এই ভেৰিয়েন্টক লৈ কেন্দ্ৰও উদ্বিগ্ন। ইতিমধ্যে ৰাজ্য চৰকাৰসমূহক সাৱধান হ’বলৈ পৰামৰ্শ দিয়া হৈছে।

এইবাৰ কেন্দ্ৰই সকলো ৰাজ্যকে কোভিড পজিটিভ নমুনা জিন’ম ছিকুৱেন্সিঙৰ বাবে প্ৰেৰণ কৰিবলৈ নিৰ্দেশ দিছে। এই নিৰ্দেশনা শুকুৰবাৰে ৰাজ্য চৰকাৰসমূহক দিয়া হৈছে বুলি স্বাস্থ্য মন্ত্ৰালয়ে প্ৰকাশ কৰিছে। কৰ’না ভাইৰাছৰ পুনৰ সংক্ৰমণৰ লগে লগে পৰিস্থিতিৰ ওপৰত তীক্ষ্ণ নিৰীক্ষণৰ বাবেই জিন’ম ছিকুৱেন্সিঙৰ নিৰ্দেশ দিয়া হৈছে।

যোৱা সপ্তাহত কেন্দ্ৰই কৰ’নাৰ নতুন ভেৰিয়েন্ট সন্দৰ্ভত সতৰ্কবাণী জাৰি কৰিছিল। কিন্তু এই পৰ্যন্ত সংক্ৰমণ বিপদজনক মাত্ৰাত উপনীত হোৱা নাই। অমাইক্ৰনৰ উপ-ভেৰিয়েণ্ট হোৱাৰ বাবে জেএন.১ ভেৰিয়েণ্টটোও অতি সংক্ৰামক, গতিকে অহা কেইসপ্তাহমানৰ ভিতৰত সংক্ৰমণৰ সংখ্যা ব্যাপকভাৱে বৃদ্ধি পাব পাৰে।

লগতে পঢ়কঃ নতুন আইন মতে চিকিৎসাৰ গাফিলতিৰ বাবে ৰোগীৰ মৃত্যু হ’লে দুবছৰৰ কাৰাদণ্ডৰ সন্মুখীন হ’ব চিকিৎসক

অৱশ্যে চিকিৎসালয়ত ভৰ্তি হোৱা ৰোগীৰ সংখ্যা এতিয়াও তুলনামূলকভাৱে কম। সংক্ৰমণ নিয়ন্ত্ৰণত থাকিলেও কেন্দ্ৰীয় স্বাস্থ্য মন্ত্ৰালয়ে এৰা ধৰা মনোভাৱ দেখুৱাবলৈ অনিচ্ছুক। সেইবাবেই প্ৰতিখন ৰাজ্যকে নিৰ্দেশ দিয়া হৈছে যে যদি কোনো ৰোগীৰ কোভিড পজিটিভ ৰিপৰ্ট আহে তেন্তে তেওঁৰ স্বাব নমুনা জিন’ম ছিকুৱেন্সিঙৰ বাবে প্ৰেৰণ কৰিব লাগিব।

এগৰাকী কেন্দ্ৰীয় বিষয়াই কয় যে ক’ৰ’না পৰিস্থিতিৰ ওপৰত চলি থকা কঠোৰ নিৰীক্ষণৰে এয়া অংশ। আৰ টি-পি চি আৰ পৰীক্ষাত পজিটিভ বুলি ৰিপ’ৰ্ট অহা সকলো নমুনাকে জিন’ম ছিকুৱেন্সিঙৰ বাবে আই এন এছ এ চি অ’ জি (INSACOG) পৰীক্ষাগাৰলৈ প্ৰেৰণ কৰা হ’ব। বিষয়াগৰাকীয়ে কয় যে আতংকিত হোৱাৰ কোনো কাৰণ নাই কিয়নো সংক্ৰমণৰ পৰা ৰক্ষা পাবলৈ সকলো ব্যৱস্থা গ্ৰহণ কৰা হৈছে।

যদিহে RT-PCR পৰীক্ষাত কৰ’না ৰিপ’ৰ্ট পজিটিভ হয় তেন্তে জিন’ম ছিকুৱেন্সিঙৰ বাবে প্ৰেৰণ কৰা হ’ব। এই জিন’ম ছিকুৱেন্সিঙৰ জৰিয়তেহে ভাইৰাছৰ মিউটেচন বা অভিযোজন জানিব পৰা যাব।

লগতে পঢ়কঃআৰু কি বাকী থাকিল! ৪৮ বছৰ কাৰাবাসত কটোৱাৰ পিছত নিৰ্দোষী প্ৰমাণিত হ’ল ব্যক্তি

স্বাস্থ্য মন্ত্ৰালয়ৰ তথ্য অনুসৰি কেৰালা, তামিলনাডু, মহাৰাষ্ট্ৰ, গোৱা, পুডুচেৰী, গুজৰাট, তেলেংগানা, পঞ্জাৱ আৰু দিল্লীত যোৱা কেইসপ্তাহমানৰ পৰা সংক্ৰমণ দ্ৰুতগতিত বৃদ্ধি পাইছে। কিন্তু চিকিৎসালয়ত ভৰ্তি বা মৃত্যুৰ হাৰ এতিয়াও তুলনামূলকভাৱে কম। আক্ৰান্তসকলৰ ভিতৰত ৯৩ শতাংশৰ মৃদু লক্ষণ দেখা গৈছে।