এন এছ চি এন (আই এম)ৰ নৃশংস আক্ৰমণত প্ৰাণ হেৰুওৱা তিৰং আবহৰ পত্নী চকত আবহৰ বিধায়ক ৰূপে শপত গ্ৰহণ

বিগত মে’ মাহত অৰুণাচল প্ৰদেশৰ টিৰাপ জিলাত এন এছ চি এন (আই এম)ৰ নৃশংস আক্ৰমণত প্ৰাণ হেৰুৱা এন পি পি নেতা তিৰং আবহৰ পত্নী তথা অৰুণাচলৰ নৱনিৰ্বাচিত বিধায়ক চকত আবহে সোমবাৰে অৰুণাচল প্ৰদেশ বিধানসভাৰ সদস্য ৰূপে শপত গ্ৰহণ কৰে।

ইটানগৰত থকা অৰুণাচল বিধানসভাৰ দৰ্জি খাণ্ডু প্ৰেক্ষাগৃহত বিধানসভাৰ অধ্যক্ষ পাচাং দৰ্জি চোনাই বিধায়ক আবহক শপত বাক্য পাঠ কৰোৱায়।

উপনিৰ্বাচনত চকত আবহে তেওঁৰ নিকটতম প্ৰতিদ্বন্দ্বী আজেত হোমটকক ১৮৮৭ টা ভোটৰ ব্যৱধানত পৰাস্ত কৰি বিধান সভালৈ নিৰ্বাচিত হৈছিল।

অৰুণাচল প্ৰদেশৰ পশ্চিম খোনচা সমষ্টিৰ পৰা প্ৰতিদ্বন্দ্বিতা আগবঢ়োৱা চকত আবহে নিৰ্দলীয় প্ৰাৰ্থী হিচাপে নিৰ্বাচনী যুদ্ধত অৱতীৰ্ণ হৈছিল।

আনহাতে, নিৰ্বাচনত জয়ী হোৱাৰ পাছতে চকত আবহে ২১ মে’ত টিৰাপ জিলাত প্ৰাণ হেৰুৱা তেওঁৰ স্বামীৰ আধৰুৱা কাম কামবোৰ সম্পূৰ্ণ কৰিব বুলি ভাষ্য দাঙি ধৰিছিল।