মুম্বাই বিমানবন্দৰত অপ্ৰীতিকৰ পৰিস্থিতি; ১৮০০টা খালী পদৰ বাবে ১৫ হাজাৰ লোক উপস্থিত

এয়াৰ ইণ্ডিয়া এয়াৰপ’ৰ্ট চাৰ্ভিচেছ লিমিটেডে চলোৱা ৱাক-ইন ইন্টাৰভিউত হাজাৰ হাজাৰ চাকৰি প্ৰাৰ্থী উপস্থিত হোৱাৰ ফলত মঙলবাৰে মুম্বাইৰ কলিনাত বিশৃংখল পৰিস্থিতিৰ সৃষ্টি হয়।হেণ্ডিমেন আৰু ইউটিলিটি এজেণ্টৰ পদৰ বাবে প্ৰায় ১৫ হাজাৰ লোকে উপস্থিত হৈছিল৷

সীমিত পদ খালী হোৱাৰ পাছতো নিযুক্তি কাৰ্যালয়ৰ বাহিৰত বিপুল জনসমাগম দেখা গ’ল। পৰিস্থিতি নিয়ন্ত্ৰণৰ বাহিৰলৈ যোৱাৰ লগে লগে আৰু ষ্টেম্পেডৰ দৰে পৰিস্থিতি ৰোধ কৰিবলৈ আবেদনকাৰীসকলক ৰিজ্যুম জমা দি সেই স্থান এৰি যাবলৈ কোৱা হয়।

এভিয়েশন ইণ্ডাষ্ট্ৰী এম্প্লয়িজ গিল্ডৰ সাধাৰণ সম্পাদক জৰ্জ আব্ৰামে নিযুক্তি প্ৰক্ৰিয়াটো ভুলকৈ পৰিচালনা কৰা বুলি কয় আৰু দাবী কৰে যে ৫০ হাজাৰ চাকৰি প্ৰাৰ্থীয়ে সাক্ষাৎকাৰত উপস্থিত হৈছে।

আব্ৰামে কয় যে, “তাত মোৰ সূত্ৰ অনুসৰি প্ৰায় ৫০ হাজাৰ লোক উপস্থিত হৈছিল। আমি কোম্পানীটোক এনে ড্ৰাইভৰ বিৰুদ্ধে সকীয়াই দিছিলোঁ। ১ কিলোমিটাৰ দৈৰ্ঘ্যৰ শাৰী আছিল। আৰক্ষীক মাতিব লাগিছিল।”

পদসমূহৰ বাবে ন্যূনতম তম অৰ্হতা SSC/10th উত্তীৰ্ণ আৰু সৰ্বোচ্চ বয়স ২৩ বছৰ।দৰমহা প্ৰতিমাহে ২২,৫৩০ টকা নিৰ্ধাৰণ কৰা হৈছিল। ৩ বছৰৰ নিৰ্দিষ্ট ম্যাদী চুক্তিৰ ভিত্তিত এই পদটো আছিল।

ইউনিয়নে ৫০ হাজাৰ আবেদনকাৰী উপস্থিত হোৱা বুলি কোৱাৰ বিপৰীতে এআই এয়াৰপৰ্ট চাৰ্ভিচেছ লিমিটেডৰ চিইঅ’ ৰামবাবু চিন্তালাচেৰুভুৱে কয় যে আবেদন পত্ৰ জমা দিবলৈ “প্ৰায় ১৫ হাজাৰ লোক” আহিছিল।

উল্লেখ্য যে, এয়াৰ ইণ্ডিয়া এয়াৰপৰ্ট চাৰ্ভিচেছ লিমিটেড পূৰ্বতে এয়াৰ ইণ্ডিয়া এয়াৰ ট্ৰেন্সপ’ৰ্ট চাৰ্ভিচেছ লিমিটেড নামেৰে জনাজাত আছিল।

৯ জুলাইত গুজৰাটত একেধৰণৰ ষ্টেম্পেডৰ দৰে পৰিস্থিতিৰ সাক্ষী হৈছিল যেতিয়া অংকলেশ্বৰত ৪০টা খালী পদৰ বাবে অনুষ্ঠিত কৰা ৱাক-ইন সাক্ষাৎকাৰত প্ৰায় ১০০০ লোক উপস্থিত হৈছিল।