বৰপেটা আৰু কৃষ্ণাইত উলহ-মালহেৰে ষট পূজা পালন

বৰপেটা:

সমগ্ৰ দেশৰ লগতে আজি বৰপেটাতো উলহ-মালহেৰে ষট পূজা পালন কৰা হয়। ষট পূজা উপলক্ষে বৰপেটা চহৰত থকা বিশেষকৈ বিহাৰী সম্প্ৰদায়ৰ লোকসকলৰ মাজত ব্যাপক উৎসাহ উদ্দীপনা দেখিবলৈ পোৱা যায় ৷

ষট পূজাৰ লগত সংগতি ৰাখি আজি বিয়লিৰ ভাগত বিহাৰী সম্প্ৰদায়ৰ লোক সকলে বৰপেটা চহৰৰ চাউলখোৱা নৈত সূৰ্য পূজা কৰে ৷ এই পূজা পালন কৰাৰ বাবে ভক্তসকলে নতুন পাচিত নৈৱেদ্য লৈ অহা দেখা যায়। নৈৰ পাৰত পূজা সমাপন কৰি নৈবৰ্দ সমূহ লৈ ভক্তসকলে পুনৰ ঘৰলৈ ৰাওনা হয় ৷

আনহাতে নিশা ১২ বজাৰ পিছত পুনৰ ভক্তসকলে নৈৰ পাৰলৈ আহি পূজা কৰিব। উল্লেখযোগ্য যে কাইলৈ সূৰ্য উদয় হোৱাৰ পূৰ্বে এই পূজাৰ সামৰণি পৰিব।

ষট পূজা প্ৰত্যক্ষ কৰাৰ বাবে চাউলখোৱাৰ পাৰঘাটত বহু লোকৰ সমাগম হৈ ঠাইখিনি একপ্ৰকাৰ সমন্বয়ৰ ক্ষেত্ৰলৈ পৰিগণিত হয় ৷

কৃষ্ণাই:

সমগ্র দেশৰ লগতে গোৱালপাৰাৰ কৃষ্ণাইতো আজি উলহ মালহেৰে বিহাৰী সম্প্ৰদায়ৰ লোক সকলে ষট পূজা পালন কৰে।

পূজা উপলক্ষে আজি আবেলি কৃষ্ণাই নৈ ঘাটত হাজাৰ হাজাৰ লোকৰ সমাগম হয়।

বিহাৰী সম্প্ৰদায়ৰ লোক সকলৰ পৰম্পৰা অনুসৰি ভক্তসকলে নৈৰ পানীত নামি সূৰ্য দেৱতাক পূজা অৰ্চনা কৰে। পূজা উপলক্ষে নৈ পাৰত ধৰ্মীয় কাৰ্যসূচী লগতে নাম প্ৰসংগৰো আয়োজল কৰা হয় ৷

ইয়াৰ উপৰি বিভিন্ন ধৰ্মাৱলম্বী লোকেও ষট পূজা উপভোগ কৰিবলৈ নৈৰ ঘাটত উপস্থিত হোৱা দেখা যায়। কাইলৈ পুৱতি নিশা এই পূজাৰ সামৰণি পৰিব।

ষট পূজাৰ বাবে আৰক্ষী প্ৰশাসনে কৃষ্ণাই নৈৰ পাৰত নিৰাপত্তা ব্যৱস্থা যথেষ্ট কটকটীয়া কৰি তোলা পৰিলক্ষিত হৈছে ৷