মুখ্য মন্ত্ৰী সৰ্বানন্দ সোণোৱালৰ উপস্থিতিত আজিৰে পৰা পৰ্যটকৰ বাবে পুনৰ মুকলি হ’ল কাজিৰঙা ৰাষ্ট্ৰীয় উদ্যান
আজিৰে পৰা পৰ্যটকৰ বাবে আনুষ্ঠানিকভাৱে মুকলি হ’ল বিশ্ব প্ৰসিদ্ধ কাজিৰঙা ৰাষ্ট্ৰীয় উদ্যান ৷
আজি ৰাতিপুৱা ৰাষ্ট্ৰীয় উদ্যানখনৰ বাগৰি আৰু কহঁৰা বনাঞ্চল আনুষ্ঠানিক ভাৱে পৰ্যটকৰ বাবে মুকলি কৰে মুখ্যমন্ত্ৰী সৰ্বানন্দ সোণোৱালে।
মুখ্য মন্ত্ৰী সোণোৱালে বাগৰি বনাঞ্চলিক বিষয়াৰ কাৰ্যালয়ৰ সমীপত ফিটা কাটি, বন্তি প্ৰজ্বলন কৰি পৰ্যটকৰ বাবে বনাঞ্চলখন মুকলি কৰে।
উদ্যানখন মুকলি কৰি দিয়া ভাষণত মুখ্যমন্ত্ৰীয়ে প্লাষ্টিক মুক্ত কাজিৰঙা নিৰ্মাণ কৰাৰ বাবে সকলোকে আহ্বান জনায়।
বাগৰিত উদ্যানখন আনুষ্ঠানিকভাৱে মুকলি কৰাৰ পাছত মুখ্য মন্ত্ৰীগৰাকীয়ে জীপচ চাফাৰী কৰি বাগৰিৰ ডোঙ্গা বন শিৱিৰলৈ যায়।
ৰাষ্ট্ৰীয় উদ্যানখন দৰ্শনৰ আৰম্ভনীতে মুখ্যমন্ত্ৰীয়ে কাজিৰঙাত নতুনকৈ নিযুক্ত গড়ঁ সুৰক্ষা বাহিনীৰ জোৱানসকলৰ অভিবাদন গ্ৰহন কৰে।
ডোঙ্গা দৰ্শন চূড়াৰ পৰা ডোঙা বিলৰ লগতে কাজিৰঙাৰ নৈসৰ্গিক দৃশ্য উপভোগ কৰি আপ্লুত হৈ পৰে মুখ্য মন্ত্ৰী সৰ্বানন্দ সোণোৱাল।
সোণোৱালৰ লগত ৰাজ্যৰ পৰিবেশ আৰু বন মন্ত্ৰী পৰিমল শুক্লবৈদ্য, কেবিনেট মন্ত্ৰী অতুল বৰা, কেশৱ মহন্তৰ আৰু ৰাজ্য সভাৰ সাংসদ কামাখ্যা প্ৰসাদ তাছা আৰু টিংখাৰ বিধায়ক বিমল বৰায়ো উদ্যানখন দৰ্শন কৰে।
আনহাতে, বাগৰিৰ পাছতে মুখ্যমন্ত্ৰী সৰ্বানন্দ সোনোৱালে সতীৰ্থ মন্ত্ৰীসকলৰ সৈতে কহঁৰাৰ মিহিমুখলৈ আহি মিহিমুখতো ফিটা কাটি , বন্তি প্ৰজ্বলন কৰি পৰ্যটকৰ বাবে উদ্যান মুকলি কৰে।
মুখ্য মন্ত্ৰীয়ে কহঁৰাত পৰ্যটকৰ বাবে নিৰ্মান কৰা তথ্যকেন্দ্ৰ পৰিদৰ্শন কৰে। কহঁৰা প্ৰবেশদ্বাৰ উন্মোচন কৰাৰ পাচতেই বোকাখাতৰ আৰক্ষী থানাৰ নৱ নিৰ্মিত গৃহ উন্মোচনৰ বাবে যাত্ৰা কৰে সৰ্বানন্দ সোনোৱালে।
আজিৰ অনুষ্ঠানত বন বিভাগৰ প্ৰধান মুখ্য বন সংৰক্ষক এ এম সিং, প্ৰধান মুখ্য বন সংৰক্ষক (বন্যপ্ৰাণী) ৰঞ্জনা গুপ্তাৰ লগতে সঞ্চালক পি শিৱকুমাৰো উপস্থিত থাকে।