৫৫ সংখ্যক জন্মদিনত নিজে প্ৰতিষ্ঠা কৰা ‘আলিবাবা’ৰ অধ্যক্ষ পদৰ পৰা ইস্তফা জেক মাৰ

আলিবাবা গ্ৰুপ হল্ডিং লিমিটেডৰ কাৰ্য্যবাহী অধ্যক্ষ তথা চীনৰ আটাইতকৈ ধনী ব্যক্তি জেক মাই বুধবাৰে তেওঁৰ ৫৫ সংখ্যক জন্মদিনত কোম্পানীটোৰ অধ্যক্ষ পদৰ পৰা ইস্তফা দিয়ে।

বিগত বৰ্ষতে জেক মাই আলিবাবাৰ অধ্যক্ষ পদৰ পৰা ইস্তফা দিব বুলি ঘোষণা কৰিছিল।

জেক মাৰ ইস্তফাৰ পাছতে আলিবাবাৰ মুখ্য কাৰ্য্যবাহী ডেনিয়েল ঝাঙে অলিবাবাৰ অধ্যক্ষ পদত জেক মাৰ স্থলাভিষিক্ত হ’ব।

ঝাংক ২০১৫ চনক আলিবাবাৰ মুখ্য কাৰ্য্যবাহী হিচাপে নিযুক্তি দিয়া হৈছিল।

নিজৰ প্ৰতিষ্ঠা আৰু অধ্যৱসায়েৰে সফল ব্যৱসায়ী হিচাপে প্ৰতিষ্ঠা লাভৰ ক্ষেত্ৰত জেক মা সমগ্ৰ বিশ্বৰ বাবে এক জলন্ত উদাহৰণ।

প্রথম অবস্থাত বাৰে বাৰে বিফল হোৱাৰ পাছতো কেনেদৰে ব্যৱসায়ত সফল হ’ব পাৰি সেই সম্বন্ধে জেক মাই বিভিন্ন সময়ত বিভিন্ন সংবাদ মাধ্যমত সাক্ষাৎকাৰ প্ৰদান কৰি আহিছে।

১৯৯৯ চনৰ ৪ এপ্ৰিলত কেইগৰাকীমান বন্ধুৰ সৈতে জেক মাই ই-কমাৰ্চ ব্যৱসায় ‘আলিবাবা’ প্ৰতিষ্ঠা কৰিছিল।

আলিবাবা প্ৰতিষ্ঠা হোৱাৰ পাছৰে পৰা সমগ্ৰ বিশ্বত আলিবাবাৰ সামগ্ৰীয়ে বজাৰ দখল কৰিবলৈ সক্ষম হয় আৰু পৰৱৰ্তী সময়ত জেক মা চীনৰ আটাইতকৈ ধনী ব্যক্তি হিচাপে পৰিগণিত হয়।