পূব লাডাখ সীমান্তত ভাৰতীয় সেনাৰ হাতত বন্দী এগৰাকী চীনা সৈন্য
ভাৰত আৰু চীনৰ মাজত লাডাখ সীমান্তত উত্তেজনা অব্যাহত থকাৰ সময়তে শুকুৰবাৰে ৰাতিপুৱা পূৱ লাডাখৰ ছুচুল চেক্টৰত ভাৰতীয় সেনা বাহিনীয়ে চীনা সৈন্য এগৰাকীক আটক কৰে।
পিপলছ লিবাৰেশ্যন আৰ্মিৰ জোৱান গৰাকীয়ে ভুলবশত ভাৰতীয় ভূখণ্ডত সোমাই পৰি ভাৰতীয় সেনা বাহিনীৰ হাতত আটক হ’বলগীয়া হয়।
জানিব পৰা মতে, সমগ্ৰ ঘটনাৰ তদন্তৰ পাছত চীনা সৈন্য গৰাকীক শনিবাৰে অথবা দেওবাৰে পুনৰ নিজ দেশলৈ ওভতাই পঠোৱা হ’ব।
চীনৰ বন্দী সৈন্য গৰাকীক নিজ দেশলৈ ওভতাই পঠোৱাৰ ক্ষেত্ৰত বৰ্তমান সময়ত সীমান্তত দুয়োখন দেশৰ সেনা বাহিনীৰ মাজত আলোচনা চলি আছে।
শুকুৰবাৰে ৰাতিপুৱাই চীনা সৈন্য গৰাকীক ভাৰতীয় ভূখণ্ডত ভাৰতীয় সেনা বাহিনীয়ে আটক কৰে বুলি ভাৰতীয় সেনাৰ সূত্ৰত প্ৰকাশ কৰে।
কি কাৰণত চীনা সৈন্য গৰাকীয়ে লাইন অফ একচুৱেল কণ্ট্ৰ’ল অতিক্ৰম কৰিলে সেই সম্পৰ্কত বৰ্তমান তদন্ত অব্যাহত ৰখা হৈছে বুলিও ভাৰতীয় সেনা বাহিনীয়ে প্ৰকাশ কৰে।