জনসংখ্যা হ্ৰাসক লৈ চিন্তিত চৰকাৰ; শিক্ষাৰ্থীসকলক শুক্ৰাণু দান কৰিবলৈ আহ্বান চীনৰ
কোভিডৰ সময়ৰ পৰা চীনত জন্মৰ হাৰ হ্ৰাস হোৱাৰ বাবে চিন্তিত হৈ পৰিছে দেশখনৰ চৰকাৰ। বেইজিং, ছাংহাইকে ধৰি বিভিন্ন চহৰৰ চিকিৎসা কেন্দ্ৰবোৰত শুক্ৰাণুৰ ভাণ্ডাৰ প্ৰায় শূন্য। সেয়েহে, চিকিৎসা কেন্দ্ৰবোৰে মহাবিদ্যালয়-বিশ্ববিদ্যালয়ৰ শিক্ষাৰ্থীসকলক শুক্ৰাণু দান কৰিবলৈ অনুৰোধ কৰি ছ’চিয়েল মিডিয়াত পোষ্ট কৰিছে।
দক্ষিণ-পশ্চিম চীনৰ য়ুনান প্ৰদেশৰ এটা বেংকে প্ৰথমে বিষয়টো তেওঁলোকৰ সামাজিক মাধ্যমৰ পৃষ্ঠাত পোষ্ট কৰিছিল আৰু যুৱ লোকসকলক এনে ধৰণৰ আবেদন জনাইছিল। পোষ্ট কৰা হৈছিল যে শিক্ষাৰ্থীসকলৰ হাত খৰচ আৰু দেশৰ স্বাৰ্থ-দুয়োটাই পূৰণ হ’ব।
তেতিয়াৰ পৰা বিষয়টোৱে এসপ্তাহৰ ভিতৰত ২ কোটি ৪০ লাখ লোকৰ দৃষ্টি আকৰ্ষণ কৰিছে। দেশৰ অন্যান্য প্ৰদেশৰ শুক্ৰাণু বেংকসমূহেও তেওঁলোকৰ সামাজিক মাধ্যমৰ পৃষ্ঠাত শুক্ৰাণু দাতাৰ যোগ্যতা সম্পৰ্কে বিভিন্ন নীতি-নিয়ম প্ৰকাশ কৰিছে।
য়ুনানৰ এটা বেঙ্কে কৈছে যে ১৬৫ চেণ্টিমিটাৰ দৈৰ্ঘ্যৰ পুৰুষ, যাৰ বয়স ২০ৰ পৰা ৪০ বছৰৰ ভিতৰত, তেওঁলোকৰ যদি কোনো সংক্ৰামক, আনুবংশিক ৰোগৰ ইতিহাস নাথাকে তেন্তে শুক্ৰাণু দান কৰাৰ বাবে যোগ্য হ’ব। ইয়াৰ বিনিময়ত তেওঁলোকৰ প্ৰত্যেককে ৪,৫০০ ইউয়ান অৰ্থাৎ ভাৰতীয় মুদ্ৰাত প্ৰায় ৫৫ হাজাৰ টকা দিয়াৰ কথাও ঘোষণা কৰা হৈছে।
ছাংহাই প্ৰদেশৰ আন এটা বেংকে ইয়াৰ দাতাসকলৰ উচ্চতাৰ বাবে ১৬৮ চেণ্টিমিটাৰ লক্ষ্য নিৰ্ধাৰণ কৰিছে। ইয়াৰ বিনিময়ত, ই ৫,০০০ হাজাৰ ইউয়ান বা ৬১হাজাৰ টকা দিয়াৰ কথাও ঘোষণা কৰিছে।
চীনৰ জনসংখ্যাৰ হাৰ এনেদৰে হ্ৰাস পাইছে যে কেইদিনমান আগতে চৰকাৰে দেশখনৰ ‘দুই সন্তান নীতি’ আইন বাতিল কৰাৰ সিদ্ধান্ত লৈছিল।