চীনা গৱেষকৰ পুনৰ বিস্ফোৰণ: কৰ’নাক চীনে ঢাকি ৰাখিব বিচৰা পৰিকল্পনাত চামিল আছিল WHO
কৰ’না ভাইৰাছৰ বিষয়ে চীনৰ চৰকাৰে প্ৰথমতেই গম পাইছিল। কৰ’নাৰ সংক্ৰমণৰ বিষয়টো ঢাকি ৰখা হৈছিল। চীন চৰকাৰৰ এই পৰিকল্পনাত চামিল হৈছিল বিশ্ব স্বাস্থ্য সংস্থা(WHO)।
চীনৰ ভাইৰ’লজিষ্ট লী মেং য়ানে এই অভিযোগ উত্থাপন কৰিছে।
আমেৰিকালৈ পলাই যাবলৈ বাধ্য হোৱা লী মে য়ানে পূৰ্বেই অভিযোগ কৰিছিল যে উহানৰ গৱেষণাগাৰতে কৰ’না ভাইৰাছৰ সৃষ্টি কৰা হৈছিল। চীনৰ চৰকাৰে তাক নিয়ন্ত্ৰণ কৰিছিল।
তেওঁ লগতে জনাইছিল যে ৰাজহুৱাভাৱে ঘোষণা কৰাৰ পূৰ্বৰে পৰাই কৰ’নাৰ সংক্ৰমণৰ কথা চীনৰ চৰকাৰে জানিছিল।
সংবাদ মাধ্যমক দিয়া শেহতীয়া এক সাক্ষাৎকাৰত ভাইৰ’লজিষ্ট গৰাকীয়ে কৈছে যে ‘চাৰ্চ-কোভ-২ হ’ল মানুহে সৃষ্টি কৰা ভাইৰাছ’।
সেই সাক্ষাৎকাৰতে তেওঁ প্ৰকাশ কৰে যে চীনে এই গোটেই বিষয়টো গোপনে ৰখাৰ চেষ্টা কৰিছিল। চীনৰ কমিউনিষ্ট পাৰ্টিয়ে বেইজিঙে দাবী কৰা উহানৰ বজাৰখনৰ পৰা কৰ’না বিয়পা কথাটো লোকৰ চকুত ধূলি দিয়াৰ উপায় হিচাপে ব্যৱহাৰ কৰিছে।
কিন্তু গৱেষকগৰাকীয়ে চাঞ্চল্যকৰভাৱে অভিযোগ কৰি কয় যে কৰ’না সংক্ৰমণৰ এই বিষয়টো গোপন কৰাৰ পৰিকল্পনাত বিশ্ব স্বাস্থ্য সংস্থাও চামিল হৈছিল।
লী মেং য়ানে লগতে কয় যে আমেৰিকালৈ গুচি গ’লেও তেওঁৰ ওপৰত চীনৰ ৰঙা চকু এতিয়াও আছে।
ছচিয়েল মিডিয়াৰ জৰিয়তে তেওঁৰ ভাৱমূৰ্তি ম্লান কৰিব বিচৰা হৈছে আৰু তেওঁৰ ওপৰত চাইবাৰ আক্ৰমণ চলোৱা হৈছে।
আনহাতে, চীনত থকা লী মেং য়ানৰ পৰিয়ালটো ভাবুকিৰ সন্মুখীন হ’বলগীয়া হৈছে বুলিও গৱেষকগৰাকীয়ে অভিযোগ কৰিছে।