অমিত শ্বাহৰ ঘোষণাক লৈ আক্ৰমণাত্মক তৰুণ গগৈ ||নাগৰিকত্ব বিধেয়ক

বিতৰ্কিত নাগৰিকত্ব বিধেয়ক সন্দৰ্ভত সোমবাৰে গুৱাহাটীত ভাৰতৰ গৃহ মন্ত্ৰী অমিত শ্বাহে কৰা ঘোষণাক লৈ আক্ৰমণাত্মক হৈ উঠিছে তৰুণ গগৈ।

অসমৰ প্ৰাক্তন মুখ্য মন্ত্ৰীজনৰ মতে, বিলখনক লৈ শ্বাহে কৰা ঘোষণাই “উত্তৰ-পূবৰ জাতীয় জীৱনৰ” ক্ষতি কৰিব; আৰু তেওঁ ইয়াৰ বিৰুদ্ধে জনজাগৰণৰ পোষকতা কৰিছে।

“এতিয়া আমি জাগিবৰ হৈছে। এওঁলোকে এতিয়া আমাক প্ৰলোভন দিব। কিন্তু অসমৰ বৃহত্তৰ স্বাৰ্থত আছুয়েই হওক বা সকলো পাহৰি এই সন্ধিখনত মাত মতাটো দৰকাৰ,” মঙলবাৰে সংবাদমেলত গগৈৰ মত।

বিধেয়কবিৰোধী পথত সদৌ অসম ছাত্ৰ সন্থাক লৈ আগবঢ়াৰ প্ৰস্তাৱো আগবঢ়াইছে প্ৰাক্তন মুখ্য মন্ত্ৰীগৰাকীয়ে।

“এন আৰ চি আছুক মূল হিচাপে লৈয়ে কৰিছিলো। কেবৰ বিৰুদ্ধে আছুক লগত লৈ আগবাঢ়ি যাব বিচাৰিছো,” এন আৰ চিক লৈ শেহতীয়া মন্তব্যৰে কংগ্ৰেছৰ ভিতৰচ’ৰাতে বিৰোধিতাৰ সন্মুখীন হোৱা বৰ্ষীয়ান নেতাগৰাকীয়ে কয়।

গগৈয়ে শ্বাহৰ ঘোষণাৰ কাৰণে অসমৰ মুখ্য মন্ত্ৰী আৰু হিমন্ত বিশ্ব শৰ্মাক দায়ী কৰিছে।

“মূল দায়ী মুখ্য মন্ত্ৰী আৰু হিমন্ত বিশ্ব শৰ্মা। বিজেপি দলটোৱে সাহসেৰে যদি ক’লেহেঁতেন এই বিলখনে অসমৰ ক্ষতি কৰিব, তেনেহ’লে তেওঁলোকে (ৰাষ্ট্ৰীয় নেতৃত্বই) অলপ চিন্তা কৰিলে হয়,” গগৈয়ে কয়।

সোণোৱাল-হিমন্ত বিশ্বক সমালোচনাৰ বিপৰীতে অমিত শ্বাহৰ সন্মুখত “কথা ক’বলৈ সাহস কৰা” চুবুৰীয়া মেঘালয়, মণিপুৰ আৰু নাগালেণ্ডৰ মুখ্য মন্ত্ৰীক গগৈয়ে ধন্যবাদ জনাইছে।

বিধেয়কখনৰ বিৰোধিতা কৰি অহা শাসকীয় অংশীদাৰ অগপ সভাপতি অতুল বৰাকো গগৈয়ে টান সমালোচনা কৰিছে।

“আমাৰ কেইজনে ক্ষমতাৰ কাৰণে প্ৰকৃত সত্য কথাটো নক’লে। অগপ দলৰ অতুল বৰাৰো এষাৰ মাতিবলৈ সাহস নহ’ল। এইসকলক বদন বুলি ক’লেও বেয়া নহ’ব,” গগৈৰ মত।

আনহাতে, বিলখন যদি আনিবই লাগে, তেনেহ’লে এন আৰ চিখনক লৈ ভেঁকোভাওনা কিয় কৰিলে বুলিও গগৈয়ে প্ৰশ্ন কৰিছে।

গগৈৰ মতে, এন আৰ চিৰ “বিফলতা”ৰ বাবে চৰকাৰ আৰু গৃহ মন্ত্ৰীৰূপে অমিত শ্বাহ “দায়ী”।

“এন আৰ চিখনত গুৰুত্ব নিদিয়াৰ কাৰণে অমিত শ্বাহ দায়ী। ইয়াত এওঁলোক ফে’ল কৰিলে। গৃহ মন্ত্ৰী এই বিষয়ত ফে’ল কৰিলে,” তেওঁ কয়।

বিধেয়কখনে উত্তৰ-পূবত ৬ষ্ঠ অনুসূচী, সংবিধানৰ ৩৭১ অনুচ্ছেদ আৰু ইনাৰ লাইন পাৰ্মিটৰ ব্যৱস্থাক অকাৰ্য্যকৰী নকৰে বুলি গৃহ মন্ত্ৰী শ্বাহে সোমবাৰে নেডা (North East Democratic Alliance)ৰ সন্মিলনত আশ্বাস দিছিল।

নেডাৰ ৪ৰ্থ সন্মিলনখনত উত্তৰ-পূবৰ আঠোখন ৰাজ্যৰ মুখ্য মন্ত্ৰীসকল আৰু মিত্ৰ দলৰ মুৰব্বীসকল উপস্থিত আছিল।