মুখ্য ন্যায়াধীশ ৰঞ্জন গগৈৰ সুৰক্ষাক লৈ চিন্তিত এজেন্সি

দেশৰ মুখ্য ন্যায়াধীশ ৰঞ্জন গগৈৰ সুৰক্ষাক লৈ চিন্তিত হৈ পৰিছে সুৰক্ষা এজেন্সি সমূহ। সেয়ে গৃহ মন্ত্ৰণালয়, বিদেশ মন্ত্ৰণালয়ৰ লগতে অন্যান্য সুৰক্ষা এজেন্সিসমূহে এই বিষয়ক লৈ অলপতে এখন উচ্চস্তৰীয় বৈঠকত মিলিত হয়।

বৈঠকত কোৱা হয় যে দেশৰ সাধাৰণ জনতাই অনায়াসে সুৰক্ষা বেহু ফালি মুখ্য ন্যায়ধীশৰ ওচৰলৈ আহি ফুলৰ মালা পিন্ধোৱাৰ লগতে চেল্ফি ল’ব পাৰে, যিটো সুৰক্ষাৰ ক্ষেত্ৰত এক বৃহৎ ভাবুকি।

এ এন আইৰ পৰা জানিব পৰা মতে, মুখ্য ন্যায়াধীশ গৰাকীৰ সুৰক্ষা বেহু যথেষ্ট দুৰ্বল বুলি বৈঠকত আলোচনা হয়। দিল্লী আৰক্ষীৰ শীৰ্ষ বিষয়া আই ডি শুক্লাৰ মতে, ‘কিছুমান ক্ষেত্ৰত দিল্লী আৰক্ষীৰ সুৰক্ষা ইমানেই দুৰ্বল হৈ পৰে যে সাধাৰণ জনতাই অনায়াসে ৰঞ্জন গগৈৰ ওচৰলৈ আহি তেওঁৰ সৈতে চেল্ফি ল’ব পাৰে। এনে কাৰ্য অতি শীঘ্ৰে বন্ধ কৰাৰ প্ৰয়োজন’।

এই বৈঠকতে মুখ্য ন্যায়াধীশ ৰঞ্জন গগৈৰ সুৰক্ষা সুনিশ্চিত কৰক নাইবা ক্ল’জ প্ৰক্সিমিটি টিম বা ক্ল’জ ৰিংগ টিম নিয়োজিত কৰাৰ বাবে সুৰক্ষা এজেন্সি সমূহক স্পষ্টকে কোৱা হয়।

আনহাতে সুৰক্ষাৰ দিশ সমূহৰ প্ৰতি লক্ষ্য ৰাখি সকলো গণ্য মান্য তথা উচ্চ পদস্থ লোক সকলৰ সুৰক্ষা সুনিশ্চিত কৰিবলৈও আহ্বান জনায়।