ইটানগৰত অনুষ্ঠিত উত্তৰ-পূব ভিত্তিক কুইজ প্ৰতিযোগিতাত উজলিল পুৰণিগুদামৰ ছাত্ৰ

অৰুণাচল প্ৰদেশৰ ইটানগৰত উত্তৰ-পূবত থকা কেন্দ্ৰীয় বিদ্যালয় সমূহৰ ছাত্ৰ-ছাত্ৰীসকলৰ মাজত অনুষ্ঠিত এখন কুইজ প্ৰতিযোগিতাত নগাঁও জিলাৰ পুৰণিগুদামৰ তনুভৱ ভাগৱতীয়ে প্ৰথম স্থান দখল কৰিবলৈ সক্ষম হয়।

পুৰণিগুদামৰ প্ৰয়াত ৰক্তিম ৰঞ্জন ভাগৱতী আৰু বৰ্ণালী ডেকা ভাগৱতীৰ একমাত্ৰ পুত্ৰ তনুভৱ নগালেণ্ডৰ লুমামি কেন্দ্ৰীয় বিদ্যালয়ৰ ষষ্ঠ শ্ৰেণীৰ ছাত্ৰ।

যোৱা ২২ আৰু ২৩ আগষ্টত ইটানগৰৰ কেন্দ্ৰীয় বিদ্যালয়ত অনুষ্ঠিত উক্ত কুইজ প্ৰতিযোগিতাখনত ছাত্ৰজনে লুমামি কেন্দ্ৰীয় বিদ্যালয়ক একক শাখাত প্ৰতিনিধিত্ব কৰি এই সফলতা অৰ্জন কৰে।

জানিব পৰা মতে কুইজ প্ৰতিযোগিতাখনত উত্তৰ-পূবৰ ৰাজ্যকেইখনৰ ৩৮খন কেন্দ্ৰীয় বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰিছিল।

উল্লেখযোগ্য যে ‘ৰাষ্ট্ৰীয় একতা পৰ্ব ২০১৯’ নামৰ অহা অক্টোবৰত নতুন দিল্লীত অনুষ্ঠিত হ’ব লগীয়া এখন ৰাষ্ট্ৰীয় পৰ্য্যায়ৰ কুইজ প্ৰতিযোগিতাৰ প্ৰতি লক্ষ্য ৰাখি উক্ত প্ৰতিযোগিতাখন অনুষ্ঠিত হৈছিল।

তেওঁৰ এই সফলতাৰ ফলত অনুভৱে এতিয়া প্ৰতিযোগিতাখনত স্থান প্ৰাপ্ত ছাত্ৰ-ছাত্ৰীসকলৰ সৈতে নতুন দিল্লীত হ’ব লগীয়া ৰাষ্ট্ৰীয় পৰ্য্যায়ৰ কুইজ প্ৰতিযোগিতাত ভাগ ল’বলৈ বাচনি হৈছে।

ইটানগৰত সফলতা অৰ্জন কৰি আজি পুৱা অনুভৱ পুৰণিগুদামস্থিত তেওঁৰ ঘৰত উপস্থিত হয়।