মিজোৰামৰ সাংসদ কে ভানলালভেনাৰ গোচৰ প্ৰত্যাহাৰ কৰিবলৈ অসম আৰক্ষীক নিৰ্দেশ মুখ্যমন্ত্ৰীৰ
মিজোৰামৰ সাংসদ কে ভানলালভেনাৰ বিৰুদ্ধে তৰা গোচৰ প্ৰত্যাহাৰ কৰাৰ সিদ্ধান্ত গ্ৰহণ কৰিছে অসম চৰকাৰে।
এই সন্দৰ্ভত অসম আৰক্ষীক নিৰ্দেশ প্ৰদান কৰিছে মুখ্যমন্ত্ৰী হিমন্ত বিশ্ব শৰ্মাই।
মাজনিশা টুইটাৰযোগে এই কথা ঘোষণা কৰিছে মুখ্যমন্ত্ৰীগৰাকীয়ে।
অসম আৰক্ষীৰ এটা দলে উচতনিমূলক মন্তব্য প্ৰদান কৰা মিজো সাংসদগৰাকীক দিল্লীত বিচাৰি গৈছিল যদিও দিল্লীৰ বাসভৱনত সাংসদগৰাকী বিচাৰি পোৱা নাছিল।
মুখ্যমন্ত্ৰী শৰ্মাই সাংসদগৰাকীৰ ওপৰত থকা গোচৰ প্ৰত্যাহাৰ কৰিলেও অসম আৰক্ষীয়ে আন মিজোৰাম আৰক্ষীৰ ওপৰত তৰা গোচৰ চলাই যাব বুলি জানিবলৈ দিয়ে।
1/2
To take this goodwill gesture ahead, I have directed @assampolice to withdraw FIR against K. Vanlalvena , Honble MP, Rajya Sabha from Mizoram. However cases against other accused police officers will be pursued.— Himanta Biswa Sarma (@himantabiswa) August 1, 2021
উল্লেখ্য যে সংসদ ভৱনৰ বাকৰিৰ পৰাই অসমীয়াক গুলীওৱাৰ হুংকাৰ প্ৰদান কৰা মিজোৰামৰ ৰাজ্যসভাৰ সাংসদ কে ভানলালভেনালৈ অসম আৰক্ষীয়ে চমন প্ৰেৰণ কৰিছিল।
চমনত অসম আৰক্ষীয়ে সাংসদগৰাকীক জবানবন্দী গ্ৰহণৰ বাবে কাচাৰৰ ধলাই থানালৈ মাতি পঠিয়াইছিল।
সাংসদ কে ভানলালভেনাই সংবাদ মাধ্যমত দিয়া সাক্ষাৎকাৰৰ সময়তে অসমীয়াক গুলীওৱাৰ ভাবুকি দিছিল। ইয়াৰ পিছতে অসম আৰক্ষীৰ চিআইডিৰ চাৰি জনীয়া দল এটাই দিল্লীলৈ গৈছিল।
বিতৰ্কিত মন্তব্য কৰাৰ পিছৰে পৰা আত্মগোপন কৰা ভানলালভেনাৰ চৰকাৰী বাসভৱন আৰু দিল্লীস্থ মিজোৰাম ভৱনলৈ অসম আৰক্ষীৰ দলটোৱে সাংসদগৰাকীক বিচাৰি গৈছিল যদিও তেওঁক নাপাই বাসভৱন আৰু মিজোৰাম হাউচৰ দেৱালতে চমন খন আঁৰি থৈ আহিছিল।
কিছুদিন পূৰ্বে মিজোৰামৰ ৰাজ্যসভাৰ সাংসদ কে ভানলালভেনাই সংবাদ মাধ্যমৰ আগত সাক্ষাৎকাৰ দি থকাৰ সময়তে অসম-মিজোৰাম সীমান্তৰ লাইলাপুৰত অসম আৰক্ষীক গুলীয়াই হত্যা কৰাৰ কথা স্বীকাৰ কৰিছিল।
সাংসদ ভানলালভেনাই কৈছিল, ’আমি তাত তেওঁলোকক গুলীয়াইছিলো। তেওঁলোকে পুনৰ আমাৰ সীমা অতিক্ৰম কৰিলেই আকৌ গুলীয়াম। ভাগ্য ভাল যে আমি আটাইবোৰকে মাৰি নেপেলালো, তেওঁলোকে যদি পুনৰ আহে আমি এইবাৰ সকলোকে হত্যা কৰিম’।
অসম আৰক্ষীক এনেদৰে মুকলি প্ৰত্যাহ্বান জনোৱা সাংসদগৰাকীৰ ভাষ্যই দেশ জুৰি তোলপাৰ লগাইছিল।
ইপিনে সীমান্তত অসম আৰক্ষীৰ ওপৰত কৰা আক্ৰমণ সন্দৰ্ভত অস্ত্ৰ আইন 25(1-A) আৰু ৰাজহুৱা সম্পত্তি ধ্বংস প্ৰতিৰোধ আইনৰ ৩ নং ধাৰাৰ অধীনতো ভাৰতীয় দণ্ডবিধিৰ 120B, 447, 336, 379, 333, 307, 302ত ধলাই থানাত ২৭ জুলাইত গোচৰ ৰুজু কৰা হৈছে ৷