কুকি উগ্ৰপন্থীৰে সম্পৰ্ক থকাৰ কথা অস্বীকাৰ মুখ্যমন্ত্ৰী হিমন্ত বিশ্ব শৰ্মাৰ

মণিপুৰত হিংসাত্মক পৰিস্থিতি অব্যাহত থকাৰ সময়তে এটা ৰাষ্ট্ৰীয় সংবাদ সংস্থাই দাবী উত্থাপন কৰিছিল যে মণিপুৰৰ কুকি উগ্ৰপন্থীৰে সম্পৰ্ক আছে বিজেপিৰ হিমন্ত বিশ্ব শৰ্মা আৰু ৰাম মাধৱৰ। বিদ্ৰোহী উগ্ৰপন্থী সংযুক্ত কুকি লিবাৰেশ্যন ফ্ৰণ্টৰ অধ্যক্ষ এছ এছ হাওকিপে লিখা এখন পত্ৰৰ যোগেদি সংস্থাটোৱে ফাদিল কৰিছিল হিমন্ত আৰু ৰাম মাধৱ সৈতে কুকি উগ্ৰপন্থীৰ সু সম্পৰ্কৰ কথা। 

কুকি নেতাগৰাকীয়ে উক্ত পত্ৰত দাবী কৰিছিল যে ২০১৭ চনৰবিধান সভাৰ নিৰ্বাচনৰ সময়ত কুকি উগ্ৰপন্থীৰ সহায় লৈছিল হিমন্ত বিশ্ব শৰ্মা আৰু ৰাম মাধৱে। লগতে নেতাগৰাকীয়ে লিখিছিল যে ২০১৭ চনত মণিপুৰৰ বিধান সভাৰ নিৰ্বাচনত কুকি উগ্ৰপন্থী সংগঠনৰ সহায়ৰ অবিহনে মণিপুৰত বিজেপি শাসনলৈ অহাটো প্ৰায় অসম্ভৱ আছিল।

হিমন্ত বিশ্ব শৰ্মাৰ বিৰুদ্ধে এই বিস্ফোৰক অভিযোগ উত্থাপন হোৱাৰ পিছতেই দেশজুৰি প্ৰতিক্ৰিয়া আৰু প্ৰতিবাদৰ সৃষ্টি হয়।   ইয়াৰ পিছত মঙলবাৰে হিমন্ত বিশ্ব শৰ্মাই কুকি উগ্ৰপন্থী সংগঠনটোৰ সৈতে কোনো সম্পৰ্ক থকাৰ কথা অস্বীকাৰ কৰি কংগ্ৰেছক তীব্ৰ সমালোচনা কৰে।

ইয়াৰ পূৰ্বে অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে অভিযোগ কৰিছিল যে ২০১৭ চনৰ মণিপুৰ বিধানসভা নিৰ্বাচনত তেওঁৰ সংগঠনটোৱে  বিজেপিক সহায় কৰা বুলি কেন্দ্ৰীয় গৃহমন্ত্ৰী অমিত শ্বাহলৈ কুকি উগ্ৰপন্থী সংগঠনৰ এজন নেতাই পত্ৰ লিখিছিল।

এই সন্দৰ্ভত মুখ্যমন্ত্ৰী শৰ্মাই এক বিবৃতিত লিখিছে, “মণিপুৰৰ একাংশ আণ্ডাৰগ্ৰাউণ্ড নেতাৰ সৈতে বুজাবুজিৰ সন্দৰ্ভত সামাজিক মাধ্যমত কিছুমান ভিত্তিহীন অভিযোগ উত্থাপন কৰা হৈছে। উগ্ৰপন্থীৰ সৈতে এনে কোনো যোগাযোগ নাই বুলি পুনৰ স্পষ্ট কৰি দিয়া হৈছে। “

উল্লেখযোগ্য যে ২০১৭ চনত প্ৰথমবাৰৰ বাবে মণিপুৰত বিজেপিয়ে ক্ষমতা দখল কৰিছিল।