কাহৰ ঔষধ ‘কলড্ৰিফ’ সেৱন কৰি আন এটি শিশুৰ মৃত্যু…

পুনৰ বিষাক্ত কাহৰ ঔষধ সেৱন কৰি গুৰুতৰভাৱে অসুস্থ হৈ পৰা মধ্যপ্ৰদেশৰ এজন চাৰি বছৰীয়া শিশুৰ দেওবাৰে নিশা নাগপুৰ এইমছত মৃত্যু ঘটে। জানিব পৰা মতে, চিৰাপ সেৱনৰ পাছতে শিশুটি যোৱা চাৰি মাহ ধৰি ক’মাত আছিল।

উল্লেখ্য যে, যোৱা বছৰ ছেপ্টেম্বৰ-অক্টোবৰ মাহত একেটা কোম্পানীৰে কাহৰ চিৰাপ সেৱন কৰি একেধৰণৰ লক্ষণত অতি কমেও ২৪ টা শিশুৰ মৃত্যু হৈছিল। পৰীক্ষাত এই চিৰাপত বৃক্ক (Kidney) বিকল কৰিব পৰা এবিধ অত্যন্ত বিষাক্ত ৰাসায়নিক পদাৰ্থ পোৱা গৈছিল।

জানিব পৰা মতে, নিহত শিশুটিৰ নাম হৰ্ষ। মধ্যপ্ৰদেশৰ বেতুল জিলাৰ টিকাবাৰী গাঁৱৰ নিবাসী হৰ্ষক যোৱা চাৰি মাহতকৈও অধিক সময় নাগপুৰ এইমছৰ আই.চি.ইউ.-ত (ICU) ভৰ্তি কৰি ৰখা হৈছিল। বেতুল জিলাৰ মুখ্য চিকিৎসা আৰু স্বাস্থ্য বিষয়া (CMHO) ডাঃ মনোজ হুৰমাদে হৰ্ষৰ মৃত্যুৰ বাতৰি নিশ্চিত কৰিছে। সোমবাৰে নাগপুৰত শিশুটিৰ মৰণোত্তৰ পৰীক্ষা সম্পন্ন কৰাৰ পাছত মৃতদেহ পৰিয়ালক গতাই দিয়া হয়।

তদন্তৰ পৰা জানিব পৰা মতে, ‘কলড্ৰিফ’ (Coldrif) নামৰ এই কাহৰ চিৰাপটোত ‘ডাইথাইলিন গ্লাইকল’ (Diethylene Glycol) নামৰ এবিধ বিষাক্ত ৰাসায়নিক পদাৰ্থ আছিল। চেন্নাইৰ চৰকাৰী পৰীক্ষাগাৰত কৰা পৰীক্ষাত এই চিৰাপটোত ৪৮.৮ শতাংশ ডাইথাইলিন গ্লাইকল পোৱা গৈছিল, যি স্বাস্থ্যৰ বাবে অত্যন্ত মাৰাত্মক। ইয়াৰ ফলত বৃক্ক বিকল হোৱাৰ লগতে প্ৰস্ৰাৱ বন্ধ হোৱা আৰু বমিৰ দৰে সমস্যাই দেখা দিয়ে।

এই শোকাবহ ঘটনাৰ পাছতে ভাৰতৰ ঔষধ নিয়ন্ত্ৰক প্ৰধানে (DCGI) বিষয়টোৰ ওপৰত তদন্ত আৰম্ভ কৰিছে। ইতিমধ্যে চিৰাপ প্ৰস্তুতকাৰী কোম্পানীৰ মালিক আৰু এই চিৰাপ খাবলৈ পৰামৰ্শ দিয়া চৰকাৰী চিকিৎসকজনক গ্ৰেপ্তাৰ কৰা বুলি জানিব পৰা গৈছে। বিগত বৰ্ষৰ অক্টোবৰ মাহৰ প্ৰথম সপ্তাহতে মধ্যপ্ৰদেশ চৰকাৰে এই বিশেষ কাহৰ চিৰাপটোৰ বিক্ৰী নিষিদ্ধ কৰিছিল।

তামিলনাডুৰ ঔষধ নিয়ন্ত্ৰণ সঞ্চালকালয়ে কাঞ্চীপুৰমৰ শ্ৰেচন ফাৰ্মাচিউটিকেলছ নামৰ কোম্পানীটোৱে প্ৰস্তুত কৰা এই ঔষধ নিৰ্ধাৰিত মান অনুসৰি প্ৰস্তুত কৰা হোৱা নাই বুলি ঘোষণা কৰিছিল।