এইবাৰ আলফা স্বাধীনত যোগদান কৰিলে কংগ্ৰেছ নেতাই; ফেচবুকত প’ষ্ট কৰিলে পত্নীলৈ লিখা দীঘলীয়া পত্ৰ
এইবাৰ আলফা স্বাধীনত যোগদান কৰিলে এগৰাকী কংগ্ৰেছ নেতাই। আলফা স্বাধীনত যোগদান কৰা নেতাজনৰ নাম জনাৰ্দন গগৈ।
চেংকয় হিচাপেও পৰিচিত জনাৰ্দন গগৈ যুৱ কংগ্ৰেছৰ তিনিচুকীয়া জিলা সমিতিৰ উপ-সভাপতি হিচাপে কাৰ্যনিৰ্বাহ কৰিছিল।
বিগত লোকসভা নিৰ্বাচনৰ প্ৰাকমুহূৰ্তত তেওঁ কংগ্ৰেছ দলত আনুষ্ঠানিকভাৱে যোগদান কৰিছিল।
জনাৰ্জন গগৈৰ ঘৰ শদিয়াৰ উদয় নগৰত বুলি জানিব পৰা গৈছে।
পত্নীলৈ উদ্দেশ্যি সামাজিক মাধ্যমত এটা দীঘলীয়া পোষ্ট কৰি তেওঁ আলফা স্বাধীনত যোগদান কৰাৰ কথা উল্লেখ কৰে। পত্নী গৰ্ভৱতী আছিল বুলিও জানিব পৰা গৈছে।
ফেচবুকত প’ষ্ট কৰা পত্নীলৈ লিখা দীঘলীয়া পত্ৰখনত জনাৰ্দন গগৈয়ে লিখিছে, ’’মই গুচি আহিলো। এচাম মানুহে অসমীয়া জাতিটোৰ অস্তিত্ব নিঃশেষ কৰিবলৈ ষড়যন্ত্ৰ কৰি আছে। জাতিটোৰ নামত দালালি কৰা সকলো ৰাজনৈতিক অথবা তথাকথিত জাতীয় দল-সংগঠনৰ চৰিত্ৰবোৰ দেখিলোঁ৷ আজি আমাৰ মানুহবোৰ নিজ মাতৃভূমিতেই অসহায় হৈ পৰিছে। এনেকৈ চকুৰ আগতে জাতিটো তিল তিলকৈ ধ্বংস হৈ যোৱাটো মই চাই থাকিব নোৱাৰো। বছৰ বছৰ ধৰি নিজ মাটিতেই প্ৰতাৰণা আৰু শোষণৰ বলি হোৱা সহজ সৰল আপোন মানুহখিনিৰ দুখ যান্ত্ৰনাখিনি দেখি বুজিও হাত সাৱটি বহি থাকিব নোৱাৰিলোঁ।‘’
তেওঁ লগতে লিখিছে, ‘’আনহাতে গণতন্ত্ৰৰ নামধাৰী এই চৰকাৰ খনে সাধাৰণ ৰাইজৰ গণতান্ত্ৰিক প্ৰতিবাদক কেতিয়াও গুৰুত্ব নিদিয়ে। জাতিৰ অস্তিত্ব ৰক্ষাৰ বাবে, জাতিৰ হেৰুওৱা স্বাধিকাৰ আৰু স্বাভিমান ঘূৰাই আনিবলৈ সশস্ত্ৰ সংগ্ৰামৰ বিকল্প নাই। এই সংগ্ৰামত বহুতে বহু ত্যাগ দিলে, আমিও দিব লাগিব। জাতিৰ স্বাধিকাৰ ঘূৰাই নোপোৱা পৰ্যন্ত; দেহত অসমীয়াৰ তেজ থকা শেষজন ব্যক্তি জীয়াই থকালৈকে এই সংগ্ৰাম চলি থাকিব। জয় পৰাজয় সময়ত নিৰূপণ হব, কিন্তু বুৰঞ্জীৰ পৃষ্ঠাত বীৰ জাতিৰ তালিকাত লিখা থকা আমাৰ নামটো আমি মচিব দিব নোৱাৰো।‘’