মালিকক বৌদ্ধিক জেহাদী আখ্যা দি বিপদত বিধায়ক : শিলাদিত্যৰ বিৰুদ্ধে চলমান খানৰ গোচৰ

হোজাইৰ বিতৰ্কিত বিধায়ক শিলাদিত্যৰ বিৰুদ্ধে হাতীগাঁও থানাত গোচৰ তৰিছে চলমান খানে।

কংগ্ৰেছৰ সংখ্যালঘু বিভাগৰ অধ্যক্ষ চলমান খানে বিতৰ্কিত বিধায়কজনে চৈয়দ আব্দুল মালিকক জেহাদী আখ্যা দিয়াৰ বিৰুদ্ধে এজাহাৰ দাখিল কৰে হাতীগাঁও থানাত।

এজাহাৰ দাখিল কৰি আহি চলমান খানে সংবাদ মাধ্যমৰ আগত কয় ‘চৈয়দ আব্দুল মালিকৰ দৰে অসমীয়া জাতিৰ এজন বৰেণ্য সাহিত্যিকক লৈ শিলাদিত্যই কৰা মন্তব্য আমি কেৱল বিৰোধিতা কৰা বা গৰিহণা দিয়াই নহয় অনতি পলমে তেওঁক গ্ৰেপ্তাৰ কৰিবলৈ দাবী জনাইছো। শিলাদিত্য দেৱে বিভিন্ন সময়ত বিভিন্ন জাতি-জনগোষ্ঠীৰ মাজত সংঘৰ্ষ লগোৱাৰ কাৰণে চেষ্টা চলাই আহিছে।‘

‘অসমৰ বিভিন্ন জদাতি-জনগোষ্ঠীৰ মাজত থকা ভাতৃত্ববোধ বিনষ্ট কৰি সাম্প্ৰদায়িক সংঘৰ্ষ লগোৱাৰ চেষ্টা কৰাৰ বাবে তেওঁক সকীয়নি দিছো। কিয় ইমান বিতৰ্কিত মন্তব্য কৰি থকাৰ পাছতো শিলাদিত্য দেবক গ্ৰেপ্তাৰ কৰা নাই?’ এইদৰে কয় খানে।

ইপিনে, ৰঙালী বিহুক বাঙালী বিহু আখ্যা দিয়া শিলাদিত্য দেৱক সকীয়াই দি চলমানৰ খানৰ মন্তব্য ‘তেওঁ অসমখনক কি বুলি ভাবিছে? শিলাদিত্যক অসমৰ কোনো ৰাইজে ভয় নকৰে। শিলাদিত্যই নিজৰ চৰিত্ৰ সলনি কৰক।‘

অসম চৰকাৰলৈ সকীয়াই দি চলমান খানে কয় ‘শিলাদিত্যৰ মুখ বন্ধ কৰক। অন্যথা আমি সমগ্ৰ অসমতে জংগী আন্দোলন গঢ়ি তুলিবলৈ বাধ্য হ’ম তথা তেওঁৰ ঘৰ ঘেৰাও কৰিবলৈ বাধ্য হ’ম।‘

ইয়াৰোপৰি, অসম সংগ্ৰামী যুৱ মঞ্চয়ো শিলাদিত্যৰ বিৰুদ্ধে হাতীগাঁও থানাত এজাহাৰ দাখিল কৰে।