কেন্দ্ৰীয় স্বাস্থ্য মন্ত্ৰী হৰ্ষবৰ্ধনক প্ৰশংসা কংগ্ৰেছ নেতা শশী থাৰুৰৰ

ক’ৰ’না প্ৰতিৰোধৰ বাবে স্বাস্থ্য মন্ত্ৰ্যালয়ে অব্যাহত ৰখা নিৰন্তৰ প্ৰয়াসৰ বাবে কেন্দ্ৰীয় স্বাস্থ্য মন্ত্ৰী ডাঃ হৰ্ষবৰ্ধন আৰু মন্ত্ৰ্যালয়ক ধন্যবাদ জ্ঞাপন কৰিছে কংগ্ৰেছৰ লোকসভা সাংসদ তথা প্ৰাক্তন কেন্দ্ৰীয় মন্ত্ৰী শশী থাৰুৰে।

সাংসদগৰাকীয়ে হৰ্ষবৰ্ধন, তেওঁৰ সহযোগী আৰু মন্ত্ৰ্যালয়ে এই সংকটৰ সময়ত ভাল কাম কৰি থকা বুলি টুইটযোগে মন্তব্য কৰে।

টুইটত থাৰুৰে কয়, ‍‘ধন্যবাদ ডাঃ হৰ্ষবৰ্ধন। এই কঠিন পৰিস্থিতিৰ সময়ত আপুনি আৰু আপোনাৰ সহযোগী সকলে যথেষ্ট ভাল কাম কৰি আছে’।

ইফালে ইয়াৰ পূৰ্বে সাংসদগৰাকীয়ে এটা টুইটত স্বাস্থ্য মন্ত্ৰীগৰাকী টেগ কৰি তেওঁৰ সমষ্টি তিৰুৱন্তপুৰম কিয় কোভিদ-১৯ হটস্পট ঘোষণা কৰা হ’ল সেই বিষয়ে মন্ত্ৰীগৰাকীৰ পৰা জানিব বিচাৰিছিল।

তেওঁৰ টুইটৰ উত্তৰত স্বাস্থ্য মন্ত্ৰীয়ে কয় যে দেশত মুঠ ১৭০ খন জিলাক হটস্পট, ২০৭ খন নন হটস্পট আৰু বাকী অসংক্ৰমক হিচাপে ঘোষণা কৰা হৈছে।

উল্লেখ্য যে কেৰালাত এই পৰ্যন্ত কোভিদ-১৯ত আক্ৰান্ত ২৪৫ গৰাকী লোক সম্পূৰ্ণ সুস্থ হৈ উঠিছে। ৰাজ্যখনৰ কাছৰগোডত সৰ্বাধিক ৫৭ টা আৰু কন্নুৰত দ্বিতীয় সৰ্বাধিক ৪৭ গৰাকী লোক ক’ৰ’নাত আক্ৰান্ত হৈছে।

আনহাতে দেশত ক’ৰ’না আক্ৰান্তৰ সংখ্যাই ১৩ হাজাৰ অতিক্ৰম কৰিলে। এই পৰ্যন্ত ১৩,৩৮৭ গৰাকী লোক আক্ৰান্ত হোৱাৰ বিপৰীতে ৪৩৭ গৰাকীৰ মৃত্যু হোৱা বুলি স্বাস্থ্য মন্ত্ৰ্যালয়ে জনায়।