বিজেপিত যোগদান বৰাক-সম্ৰাট গৌতম ৰয়ৰ ঘনিষ্ঠ কংগ্ৰেছী নেতাৰ

আগন্তুক লোকসভা নিৰ্বাচনলৈ মাজত মাথো কেইদিনমান বাকী থকাৰ সময়তেই অসমৰ কংগ্ৰেছ নেতা তথা দলটোৰ প্ৰাক্তন সাধাৰণ সম্পাদক টুটু সৰকাৰে আজি বিজেপিত সাংগোপাংগসহ যোগদান কৰিছে। বহুবল্কী নেতা তথা বৰাক সম্ৰাট গৌতম ৰয়ৰ একালৰ ঘনিষ্ঠ টুটু সৰকাৰৰ বিজেপিত যোগদানে কংগ্ৰেছক ক্ষতিগ্ৰস্ত কৰিব বুলি বিবেচিত হৈছে।

গুৱাহাটীৰ হেঙেৰাবাৰীস্থিত বিজেপিৰ ৰাজ্যিক মুখ্য কাৰ্যালয়ত অনুষ্ঠিত যোগদান কাৰ্যসূচীত ৰাজ্যিক সভাপতি ৰঞ্জিত দাসে টুটু সৰকাৰৰ লগতে তেওঁৰ লগত অহা শতাধিক সমৰ্থকক বিজেপিলৈ আদৰণি জনায়। টুটু সৰকাৰৰ লগতে জালুকবাৰীৰ প্ৰণৱ কুমাৰ বৰুৱা, যোৰহাটৰ আদিত্য প্ৰকাশ শৰ্মাইয়ো শাসনাধিস্থ দলটোত আনুষ্ঠানিকভাৱে যোগদান কৰে।

যোগদানৰ পাছতে সৰকাৰে কয় যে ২০০১ৰ পৰাই কংগ্ৰেছ কৰি আছিলো। এন এছ য়ু আইৰ পৰা য়ুথ কংগ্ৰেছলৈ সকলোতে সক্ৰিয়তাৰে তথা নিষ্ঠা সহকাৰে সেৱা আগবঢ়াইছিলো।

‘ইমানদিনে কংগ্ৰেছে কেৱল প্ৰতিশ্ৰুতিহে দি আহিছিল। হাতে কামে একো কৰা নাছিল। কংগ্ৰেছে কেৱল সভা সমিতি অনুষ্ঠিত কৰিব জানিছিল।” বিজেপিত যোগদান কৰিয়ে কংগ্ৰেছৰ সমালোচনাত এইদৰে ব্যস্ত হৈ পৰে নেতাজন।

বিজেপিত যোগদান কৰি নথৈ আনন্দিত হোৱা বুলি উল্লেখ কৰি সৰকাৰে কয় ‘বিজেপিয়ে হাতে কামে কৰে। মই কংগ্রেছৰ পৰা ওলাই আহোতে মোৰ লগৰ কংগ্ৰেছ কৰ্মীসকলে বহুত ভাল পাইছিল। সেইসকল আজিও মোৰ লগত আছে’।

ইয়াৰ উপৰি আজিৰ এই অনুষ্ঠানতে তুম্পা দে, পুলক দাস, পংকজ চৌধুৰী, অমিতাভ দেৱ চৌধুৰী, নিপন সৰকাৰ, মুন্না বিশ্বাসৰ লগতে শতাধিক কৰ্মীয়ে বিজেপিত যোগদান কৰে। ইফালে বিজেপিৰ ৰাজ্যিক সাধাৰণ সম্পাদক দিলীপ শইকীয়াই মিছ কলৰ জৰিয়তে সকলোকে বিজেপিত যোগদান কৰোৱায়।