কংগ্ৰেছ-জাতীয় পৰিষদৰ মিত্ৰতা তুংগত! নিশ্চিত হ’ল আসনৰ বুজাবুজি!

কংগ্ৰেছ আৰু নতুনকৈ গঠিত অসম জাতীয় পৰিষদৰ মিত্ৰতা প্ৰায় চুড়ান্ত হৈছে।
অসম কংগ্ৰেছে আগন্তুক উপ-নিৰ্বাচনত এখন বিধানসভা আসন অসম জাতীয় পৰিষদক এৰি দিয়াৰ সম্ভাৱনা আছে।

বিশেষ সূত্ৰ অনুসৰি এই কথা পোহৰলৈ আহিছে।

বাতৰি অনুসৰি, কংগ্ৰেছ দলৰ সূত্ৰই জনাইছে যে বৃহস্পতিবাৰে “অসম প্ৰদেশ কংগ্ৰেছ কমিটিৰ মুৰব্বী ভূপেন বৰা আৰু এজেপিৰ সভাপতি লুৰিনজ্যোতি গগৈ আৰু সাধাৰণ সম্পাদক জগদীশ ভূঞাৰ মাজত এক উচ্চ পৰ্যায়ৰ বৈঠক অনুষ্ঠিত হয়।

এই বৈঠকতে মিত্ৰতা আৰু আসন সম্পৰ্কীয় বুজাবুজি নিশ্চিত হয় বুলি জানিব পৰা গৈছে।

কংগ্ৰেছে এজেপিৰ বাবে মাজুলী আসন এৰি দিয়াৰ যথেষ্ট সম্ভাৱনা আছে। তদুপৰি যদি লুৰিনজ্যোতি গগৈয়ে মৰিয়নিৰ পৰা প্ৰতিদ্বন্দিতা কৰে, তেন্তে এপিচিচিয়ে আনকি মৰিয়নি আসন এৰি দিব পাৰে বুলিও সূত্ৰত প্ৰকাশ।

উল্লেখ্য যে থাওৰা, মৰিয়নি, ভাবানীপুৰ, তামুলপুৰ আৰু গোসাইগাঁও সমষ্টিত ৩০ অক্টোবৰত উপ নিৰ্বাচন অনুষ্ঠিত হ’ব।

ইফালে, মাজুলী আসনখনো খালী হৈ আছে যদিও ইয়াৰ প্ৰতিনিধি কেন্দ্ৰীয় মন্ত্ৰী সৰ্বানন্দ সোণোৱালে নিৰ্বাচন আয়োগে নিৰ্বাচনৰ সময়সূচী ঘোষণা কৰাৰ কেইঘণ্টামান পিছতহে বিধানসভাৰ পৰা পদত্যাগ কৰাৰ বাবে এই সমষ্টিৰ নিৰ্বাচন পিছত অনুষ্ঠিত হ’ব।

স্মৰ্তব্য যে বিগত বিধানসভা নিৰ্বাচনৰ সময়ত কংগ্ৰেছে থাওৰা আৰু মৰিয়নি আসন লাভ কৰিছিল। কিন্তু দুইটা সমষ্টিৰ বিধায়কদ্বয়ে পিছত বিজেপিত যোগদান কৰাৰ বাবে এই সমষ্টি কেইটাত পুনৰ নিৰ্বাচন অনুষ্ঠিত হ’ব।