দেশক ভাষণ নহয় সঠিক সমাধানৰহে প্ৰয়োজন : প্ৰধান মন্ত্ৰী মোদীৰ ভাষণক কটাক্ষ কংগ্ৰেছৰ

লকডাউন বলৱৎ হৈ নাথাকিলেও দেশৰ পৰা ক’ৰ’না আঁতৰি যোৱা নাই বুলি মঙলবাৰে প্ৰধান মন্ত্ৰী নৰেন্দ্ৰ মোদীয়ে দেশবাসীক সম্বোধি দিয়া ভাষণক লৈ এতিয়া বিৰোধী আক্ৰমণাত্মক হৈ উঠিছে।

দেশৰ মুখ্য বিৰোধী দল কংগ্ৰেছে প্ৰধান মন্ত্ৰীৰ ভাষণ দেশবাসীক নালাগে, কেৱল সঠিক সমাধানৰহে প্ৰয়োজন বুলি মন্তব্য কৰে।

কংগ্ৰেছ দলৰ মুখপাত্ৰ তথা জ্যেষ্ঠ নেতা ৰণদীপ সুৰজেৱালাই এটা টুইটেৰে কয় যে মোদী চৰকাৰে মহামাৰী হ্ৰাস আৰু অৰ্থব্যৱস্থা সুদৃঢ় কৰাৰ ক্ষেত্ৰত দুয়োটাতে বিফল হৈছে।

সুৰজেৱালা আৰু কংগ্ৰেছ মুখপাত্ৰ পৱন খেড়াই কয়, ‘কৃপা কৰি দেশবাসীক জনাওক যে মহামাৰী কেনেদৰে নিয়ন্ত্ৰণ হ’ব আৰু অৰ্থনীতি কিদৰে পুনৰুদ্ধাৰ হ’ব? তেওঁলোকৰ ওচৰত ইয়াৰ কিবা সমাধান আছে নে ইয়াৰ বাবে ভগৱানক দোষ দিব’।

তেওঁলোকে লগতে কয়, ‘ক’ৰ’নাৰ বিৰুদ্ধে যুঁজ চলি আছে আৰু এই সময়ত আমাৰ নেতা অন্তৰ্ধান হয়। তেওঁলোকে কেৱল টিভিত উপদেশ দিবলৈ আহে’।

কংগ্ৰেছ নেতা দুগৰাকীয়ে লগতে কয় যে মোদীয়ে ১৮ মাৰ্চত দাবী কৰি কৈছিল যে আমি ২১ দিনত ক’ৰ’না যুঁজত জয়ী হম। কিন্তু আজি ২১০ দিনৰ পিছতো ক’ৰ’না শেষ হোৱা নাই।

উল্লেখ্য যে প্ৰধান মন্ত্ৰী মোদীয়ে মঙলবাৰে ক’ৰ’না প্ৰতিৰোধৰ স্বাৰ্থত ক’ভিড প্ৰটক’ল মানি চলিবলৈ দেশবাসীক আহ্বান জনাইছিল।