১৯ ডিচেম্বৰত দিল্লীত অনুষ্ঠিত হ’ব ইণ্ডিয়া মিত্ৰজোঁটৰ বৈঠক; আসন ভাগ-বতৰাক লৈ চৰ্চাৰ সম্ভাৱনা
বৈঠকৰ তাৰিখ আৰু পিছুৱালে। ইণ্ডিয়া মিত্ৰজোঁটৰ চতুৰ্থখন বৈঠক ১৭ ডিচেম্বৰত নহয়, ১৯ ডিচেম্বৰতহে অনুষ্ঠিত হ’ব। দেওবাৰে এই কথা ঘোষণা কৰে কংগ্ৰেছৰ সাধাৰণ সম্পাদক জয়ৰাম ৰমেশে।
বৈঠকত কিয় বিলম্ব হ’ল সেই কথা অৱশ্যে তেওঁ নক’লে। সূত্ৰসমূহৰ মতে লোকসভা নিৰ্বাচনৰ পূৰ্বে এই বৈঠকত বিজেপি বিৰোধী দলসমূহে আসন ভাগ-বতৰা সম্পৰ্কে আলোচনা কৰিব।
মধ্যপ্ৰদেশ, ৰাজস্থান, ছত্তীশগড়ত কংগ্ৰেছৰ পতনৰ পিছত মল্লিকাৰ্জুন খাৰ্গে খৰখেদাকৈ নতুন দিল্লীত ৬ ডিচেম্বৰত এখন বৈঠক আহ্বান কৰিছিল।
কিন্তু সেই বৈঠকৰ প্ৰাকক্ষণত পশ্চিমবংগৰ মুখ্যমন্ত্ৰী মমতা বেনাৰ্জী, তামিলনাডুৰ মুখ্যমন্ত্ৰী এম কে ষ্টেলিন, ঝাৰখণ্ডৰ মুখ্যমন্ত্ৰী হেমন্ত ছোৰেন, বিহাৰৰ মুখ্যমন্ত্ৰী নীতিশ কুমাৰ, সমাজবাদী পাৰ্টিৰ নেতা অখিলেশ যাদৱ উপস্থিত থাকিব নোৱাৰিব বুলি জনাই দিছিল।
লগতে পঢ়কঃইৰাণৰ শান্তিৰ নোবেল বঁটা বিজয়ী কাৰাবন্দী নাৰ্গিছ মহম্মদীৰ হৈ বঁটা গ্ৰহণ কৰিলে দুই যমজ সন্তানে
সেই বৈঠক স্থগিত ৰখাৰ পিছত আৰজেডিৰ মুৰব্বী মন্ত্ৰী লালু যাদৱে ঘোষণা কৰে যে মিত্ৰজোঁটৰ পৰৱৰ্তী বৈঠক ১৭ ডিচেম্বৰত হ’ব। কিন্তু সেয়াও নহ’ল। এইবাৰ ১৯ ডিচেম্বৰ চূড়ান্ত কৰা হৈছে।