প্ৰসংগ প্ৰাক্তন কংগ্ৰেছী মন্ত্ৰী অজন্তা নেওগ : কংগ্ৰেছৰ পৰা পদত্যাগ নে বহিস্কাৰ?

কংগ্ৰেছত এতিয়া উঠিছে পদত্যাগৰ জোঁৱাৰ। কংগ্ৰেছৰ পৰা পদত্যাগ কৰিছে প্ৰাক্তন মন্ত্ৰী তথা সুদীৰ্ঘ সময় ধৰি কংগ্ৰেছৰে জৰিত হৈ থকা অজন্তা নেওগে।

দীৰ্ঘদিন ধৰি নেওগে বিজেপি গমন কৰিব বুলি চৰ্চা চলি আছিল ।

হয়তো কাইলৈ অমিত শ্বাহৰ উপস্থিতিত গোলাঘাট সমষ্টিৰ বিধায়িকা অজন্তা নেওগে বিজেপি দলত যোগদান কৰাৰ পূৰ্ণ সম্ভাৱনা আছে।

ইপিনে, বিজেপি দলত অজন্তা নেওগৰ যোগদান সম্পর্কে প্ৰচাৰিত বাতৰি সন্দৰ্ভত আজিৰ ভিতৰত নিজৰ স্থিতি স্পষ্ট কৰিবলৈ প্ৰদেশ কংগ্ৰেছৰ তৰফৰ পৰা বৃহস্পতিবাৰে আহ্বান জনাইছিল।

কিন্তু সেই আহ্বানৰ প্ৰতি সহাৰি নজনোৱাত বা এই স্পষ্টীকৰণৰ উত্তৰ পদত্যাগৰে দিয়াত ক্ষুণ্ণ হৈ প্ৰদেশ কংগ্ৰেছৰ পৰা আজি বিয়লি ভাগত দল বিৰোধী কাৰ্য্যত লিপ্ত থকাৰ অভিযোগত বহিস্কাৰ কৰে অজন্তা নেওগক।

প্ৰদেশ কংগ্ৰেছৰ সাধাৰণ সম্পাদক ৰঞ্জন বৰাৰ স্বাক্ষৰ সম্বলিত এক জাননীৰ জৰিয়তে দলৰ পৰা বহিস্কাৰ কৰা হৈছে নেওগক।

ইপিনে, অজন্তা নেওগৰ পদত্যাগ পত্ৰ ৰিপুন বৰাই লাভ কৰিছে নেকি বুলি আমাৰ সাংবাদিকে ৰিপুন বৰাৰ ঘনিষ্ঠ প্ৰদেশ কংগ্ৰেছৰ নেতৃত্বক সোধাত তেওঁ বৰ্তমানলৈকে লাভ কৰা নাই বুলি কয়।

উল্লেখযোগ্য যে, যোৱা ১৭ ডিচেম্বৰত মুখ্য মন্ত্ৰী সৰ্বানন্দ সোণোৱালক চৰকাৰী বাসগৃহত সাক্ষাৎ কৰিবলৈ যোৱাৰ বাবে গোলাঘাট জিলা কংগ্ৰেছৰ সভাপতি পদৰ পৰা অপসাৰণ কৰা হৈছিল অজন্তা নেওগক।

ইপিনে প্ৰদেশ কংগ্ৰেছৰ সভাপতি ৰিপুন বৰাৰ দাবী আছিল এনেধৰণৰ, ‘অজন্তা নেওগক ভয়-ভাবুকি দেখুৱাইছে বিজেপিয়ে যাতে তেওঁ বিজেপিলৈ যায়। তেওঁক বিজেপিয়ে ব্লেক মেইলিঙ কৰিছে। যোৱা ৯ ডিচেম্বৰলৈকে কংগ্ৰেছৰ তত্বাবধায়কৰ সৈতে মই ঘৰলৈ যাওঁতে কোনো কাৰণতে বিজেপিত নাযায় বুলি স্পষ্ট কৰি দিছিল। বাহিৰৰ মানুহৰ পৰা শুনিছো বিজেপিৰ পৰা তেওঁৰ ওপৰত যথেষ্ট হেঁচা পৰিছে।’

কিন্তু আজি হঠাৎ অজন্তা নেওগৰ কংগ্ৰেছৰ পৰা পদত্যাগৰ খবৰে ৰাজনৈতিক মহলত একপ্ৰকাৰৰ খলকনিৰ সৃষ্টি কৰিছে।