মুখ্যমন্ত্ৰীৰ ভূমি কেলেংকাৰীৰ বিৰুদ্ধে গাঁৱৰ জকাইচুকৰ পৰা দিল্লীলৈ চলিব প্ৰতিবাদ
মুখ্যমন্ত্ৰীৰ পৰিয়ালৰ বৃহৎ ভূমি কেলেংকাৰীৰ বিৰুদ্ধে গাঁৱৰ জকাই চুকৰ পৰা চহৰলৈ, চহৰৰ পৰা জিলাৰ সদৰলৈ, জিলাৰ সদৰৰ পৰা ৰাজ্যৰ প্ৰধান কেন্দ্ৰলৈ ৰাজ্যৰ পৰা দিল্লীলৈকে মুখ্যমন্ত্ৰীৰ পৰিয়ালৰ বৃহৎ ভূমি কেলেংকাৰীৰ বিৰুদ্ধে ধাৰাবাহিক আন্দোলন কৰিব প্ৰদেশ কংগ্ৰেছে।
ৰাজীৱ ভৱনত সংবাদমেল অনুষ্ঠিত কৰি এই কথা ঘোষণা কৰে প্ৰদেশ কংগ্ৰেছৰ সাধাৰণ সম্পাদক অপূৰ্ব ভট্টাচাৰ্যই।
অহা ১০ জানুৱাৰীৰ পৰা ৯ ফেব্ৰুৱাৰীলৈকে প্ৰায় ১ মাহ জুৰি চলিব এই আন্দোলন। ভূমিহীন, বঞ্চিত, নিস্পেষিত জনসাধাৰণক লগত লৈ চলিব এই সংগ্ৰাম।
তেওঁ আৰু কয় “দুৰ্নীতিৰ বিৰুদ্ধে শূন্য সহনশীল বুলি কংগ্ৰেছ দলক কটাক্ষ কৰা মুখ্যমন্ত্ৰীৰ পৰিবাৰ আৰু পৰিয়ালৰ বৃহৎ ভূমি কেলেংকাৰী। দৰিদ্ৰ লোকে ন্যায় নোপোৱালৈকে অসম প্ৰদেশ কংগ্ৰেছ কমিটি কেতিয়াও ক্ষান্ত নহয়। বঞ্চিত ভূমিহীনৰ পক্ষে মাত মতাৰ সময় এয়া।”
অপূৰ্ব ভট্টাচাৰ্য্যৰ প্ৰশ্ন “চিলিং চৰকাৰী মাটি কেনেকৈ মুখ্যমন্ত্ৰীৰ পৰিয়ালে ক্ৰয় কৰিলে? RBS ৰিয়েল্টৰ্ছৰ বাবে আইন বেলেগ নেকি?”
মুখ্যমন্ত্ৰীৰ পৰিয়ালৰ ভূমি কেলেংকাৰীৰ বিৰুদ্ধে এতিয়া এইদৰে সৰৱ হৈ পৰা দেখিবলৈ পোৱা গৈছে প্ৰদেশ কংগ্ৰেছৰ নেতৃত্ব।
গুৱাহাটী উচ্চ ন্যায়ালয়ৰ কৰ্মৰত ন্যায়াধীশৰ দ্বাৰা মুখ্যমন্ত্ৰীৰ পৰিয়ালৰ ভূমি কেলেংকাৰীৰ বিৰুদ্ধে তদন্তৰ দাবী তুলি গাঁৱৰ জকাই চুকৰ পৰা দিল্লীলৈকে চলাই নিব এই আন্দোলন।