হ্ৰাস হ’ব পাৰে খোৱা তেলৰ মূল্য, কেন্দ্ৰ চৰকাৰে গ্ৰহণ কৰিলে এনে পদক্ষেপ

দেশত ২০১৯ বৰ্ষৰ দীপাৱলীৰ পৰা ২০২০ বৰ্ষৰ দীপাৱলীলৈ খোৱা তেলৰ দাম প্ৰায় ৪০ শতাংশ বৃদ্ধি পাইছে।

১০০ বছৰৰ ভিতৰত প্ৰথমবাৰৰ বাবে খোৱা তেলৰ দাম ইমান দ্ৰুত গতিত বৃদ্ধি পোৱা পৰিলক্ষিত হৈছে।

প্ৰথমৰ পৰা ক’ৰ’না আৰু ল’কডাউনৰ সৈতে সংগ্ৰামৰত জনসাধাৰণক খোৱা তেলৰ মূল্য বৃদ্ধিয়ে জুৰুলা কৰি পেলাইছে।

অখিল ভাৰতীয় খোৱা তেল ব্যৱসায়ী মহসংঘৰ ৰাষ্ট্ৰীয় অধ্যক্ষ শংকৰ ঠক্কৰে কয় যে আন্তঃৰাষ্ট্ৰীয় বজাৰত খোৱা তেলৰ মূল্যবৃদ্ধিৰ প্ৰতি গুৰুত্ব আৰোপ কৰি কেন্দ্ৰ চৰকাৰে পালম তেলৰ আমদানি শুক্ল হ্ৰাস কৰিব লাগে।

পৰৱৰ্তী সময়ত কেন্দ্ৰ চৰকাৰে এই শুক্ল হ্ৰাস কৰাৰ সিদ্ধান্ত গ্ৰহণ কৰে যাৰফলত খোৱা তেলৰ মূল্য প্ৰতি লিটাৰত ৭ টকা হ্ৰাস হোৱা সম্ভাৱনা আছে।

ভাৰতে মূলত ইণ্ডোনেছিয়া আৰু মালেছিয়াৰ পৰা পালম তেল আমদানি কৰি আহিছে।

আনহাতে, কেন্দ্ৰ চৰকাৰে অক্টোবৰ মাহৰ পৰা সৰিয়হৰ তেলৰ সৈতে অন্য তেল ২০ শতাংশ মিশ্ৰণ কৰাৰ যি অনুমতি আছিল সেয়া বাতিল কৰাৰ সিদ্ধান্ত গ্ৰহণ কৰিছে।

ইয়াৰ ফলত সৰিয়হৰ তেল ব্যৱসায়ী সকলে সম্পুৰ্ণ বিশুদ্ধ সৰিয়হৰ তেল বিক্ৰী কৰিব লগীয়া হ’ব আৰু চলিত বৰ্ষত দেশত সৰিয়হৰ খেতিও পূৰ্বৰ তুলনাত বেয়া হৈছে।

চৰকাৰৰ সৰিয়হৰ তেলৰ সৈতে অন্য তেলৰ মিশ্ৰণ বন্ধ কৰাৰ যি সিদ্ধান্ত সেই সিদ্ধান্তৰ ফলত এতিয়া সৰিয়হৰ তেল প্ৰস্তুতকাৰী সংস্থা সমূহৰ খৰচ বৃদ্ধি হৈছে।

দিল্লী উচ্চ ন্যায়ালয়ত চৰকাৰৰ এই সিদ্ধান্তৰ বিৰোধিতা কৰি দুখন আবেদন দাখিল কৰা হৈছে। ডিচেম্বৰ মাহত ন্যায়ালয়ত ইয়াৰ ওপৰত শুনানি অনুষ্ঠিত কৰিব।

সকলো দিশ পৰ্যালোচনা কৰি চালে চলিত বৰ্ষত সৰিয়হৰ তেলৰ মূল্য হ্ৰাস হোৱাৰ কোনো সম্ভাৱনা নায়।