‘বিদেশীক সংস্থাপনৰ বাবে স্বদেশীক গুলীয়াই হত্যা কৰা এইখন প্ৰথম চৰকাৰ’: ৰাইজৰ দলৰ আহ্বায়ক

বিশ্বনাথত গঠন কৰা হ’ল ৰাইজৰ দলৰ বিশ্বনাথ জিলা আহ্বায়ক সমিতি। বিশ্বনাথ চাৰিআলিস্থিত ড’ ভূপেন হাজৰিকা প্ৰেক্ষাগৃহত অনুষ্ঠিত হয় এই আহ্বায়ক সমিতি গঠনৰ কাৰ্যসূচী।

এই আহ্বায়ক সমিতি গঠন কৰাৰ পিছত সাংবাদিকৰ সৈতে হোৱা সাক্ষাৎকাৰত ৰাজ্যিক আহ্বায়ক ড’ হৰি কান্ত দাসৰ স্পষ্ট ঘোষণা ৰাইজে ২০২১ত বিজেপিক ব্ৰহ্মপুত্ৰত বিসৰ্জন দিব।

তেওঁ কয় যে উত্তৰ প্ৰদেশতকৈও ভয়ংকৰ কেলেংকাৰি সংঘটিত হৈছে অসমত। চৰকাৰে চাকৰি সৃষ্টি কৰিব পৰা নাই বা নিযুক্তি দিব পৰা নাই  অথচ আৰক্ষী উপ-পৰিদৰ্শক, পঞ্চায়ত আৰু গ্ৰামোন্নয়নৰ দৰে গুৰুত্বপূৰ্ণ বিভাগৰ নিযুক্তিত সংঘটিত হৈছে ব্যাপক কেলেংকাৰি।

তেওঁ অভিযোগ কৰে যে এই কেলেংকাৰি ঢাকিবৰ বাবে মোগলৰ প্ৰসংগ আনিছে মুখ্যমন্ত্ৰীয়ে। বিশেষকৈ ইতিহাস নাজানে মুখ্যমন্ত্ৰীয়ে।

‘’সমান্তৰালকৈ “কা” আন্দোলনৰ সময়ত এঘন্টাত ৫ জনকৈ স্বদেশীক গুলিয়াই হত্যা কৰিলে বিদেশীক সংস্থাপন কৰিবৰ বাবে। এইখনেই প্ৰথম চৰকাৰ য’ত বিদেশীক সংস্থাপনৰ বাবে স্বদেশীক গুলিয়াই হত্যা কৰা হ’ল,’’-তেওঁ কয়।

ইপিনে, এই আহ্বায়ক সমিতি গঠন কৰা মূহুৰ্তত মুখ্য অতিথি হিচাপে অংশ গ্ৰহণ কৰিছিল ৰাইজৰ দলৰ ৰাজ্যিক আহ্বাহক দিবস ফুকন, পুলিন ভট্টাচাৰ্য, ড’ হৰি কান্ত দাস। তদুপৰি, এই আহ্বায়ক সমিতি বিশ্বনাথ জিলা গঠন কৰাৰ ক্ষেত্ৰত আগভাগ লোৱা ৰঞ্জিত দত্ত, সূৰ্য বৰা, বিনয় হাজৰিকা সহ বহু সংখ্যক লোক উপস্থিত থাকে।

আহ্বায়ক সমিতিখনত গহপুৰৰ বিহালী আৰু বিশ্বনাথৰ বহু জাতীয় দল-সংগঠনৰ নেতাক সামৰি  ১০১ জনীয়া বিশ্বনাথ জিলা আহ্বায়ক সমিতি গঠন কৰা হয়।

আহ্বায়ক সমিতিখনে অনাগত দিনত বিশ্বনাথ জিলাত ৰাইজৰ দলৰ পূৰ্ণ পৰ্যায়ৰ সমিতি সমূহ গঠন কৰি সাংগঠানিক দিশ অধিক শক্তিশালী ৰূপত গঢ়ি তুলি ২০২১ চনৰ বিধানসভা নিৰ্বাচনত ৰাজ্য চৰকাৰৰ বিৰুদ্ধে নিৰ্বাচনী কুচকাৱাজ চলোৱাৰ বাবে প্ৰচেষ্টা অব্যাহত ৰাখিব।

আনহাতে, এই আহবায়ক সমিতি গঠন কৰা মূহুৰ্তত ৰাইজৰ দলৰ ৰাজ্যিক আহ্বায়ক ড’ হৰি কান্ত দাসে নিজৰ ভাষণত ৰাজ্যৰ বিজেপি চৰকাৰ বিৰুদ্ধে সমালোচনাত মুখৰ হৈ পৰে।