মাৰ্কিন ৰাষ্ট্ৰপতি নিৰ্বাচনী প্ৰচাৰত সামাজিক দূৰত্ব মানি চলা নাই ৰাষ্ট্ৰপতি ড’নাল্ড ট্ৰাম্পে!
ক’ৰ’নাতংকৰ মাজতে আমেৰিকা যুক্তৰাষ্ট্ৰত আৰম্ভ হৈছে আগন্তুক ৰাষ্ট্ৰপতি নিৰ্বাচনৰ নিৰ্বাচনী প্ৰচাৰ।
ইয়াকেলৈ ঠাইয়ে ঠাইয়ে জন সমাৱেশৰো আয়োজন কৰি আহিছে ৰাষ্ট্ৰপতি ড’নাল্ড ট্ৰাম্পে।
উল্লেখ্য যে, মাৰ্কিন ৰাষ্ট্ৰপতিৰ পৰৱৰ্তী নিৰ্বাচনত পুনৰ প্ৰতিদ্বন্দ্বিতা কৰিব ৰাষ্ট্ৰপতি ড’নাল্ড ট্ৰাম্পে।
একাংশ মাৰ্কিন সংবাদ প্ৰতিষ্ঠানে এই নিৰ্বাচনী সভাবোৰত সামাজিক দূৰত্বক মানি চলা নাই বুলি অভিযোগ উত্থাপন কৰিছে ৰাষ্ট্ৰপতি ড’নাল্ড ট্ৰাম্পৰ বিৰুদ্ধে।
বিগত ২০ জুনৰ নিৰ্বাচনী সভা বিষয়ে উল্লেখ কৰি দ্য ৱাশ্বিংটন প’ষ্টএ কয় যে ওকলাহোমা চেন্টাৰৰ ড’নাল্ড ট্ৰাম্পৰ জন সভাত সামাজিক দূৰত্ব মানি চলা হোৱা নাছিল।
সংবাদ পত্ৰখনে কয় যে, ১৯ হাজাৰ আসনযুক্ত ষ্টেডিয়ামখনত এখন আসন এৰি এখন আসনত বহিবলৈ লোকসকলক নিৰ্দেশ দিয়া হৈছিল। তাৰ বাবে জনসভা আৰম্ভ হোৱাৰ পূৰ্বে দুখন আসনৰ মাজৰ আসনত অনুগ্ৰহ কৰি ইয়াত নবহিব বুলি ষ্টিকাৰ লগোৱা হৈছিল।
কিন্তু ড’নাল্ড ট্ৰাম্পৰ নিৰ্বাচনী প্ৰচাৰৰ দায়িত্ব থকা সংস্থাসমূহে আসনত লগাই থোৱা সেই ষ্টিকাৰসমূহ এৰুৱাই দিয়া বুলি দ্য ৱাশ্বিংটন প’ষ্টএ দাবী কৰিছে।
এই দাবীৰ সমৰ্থনত এটি ভিডিঅ’ও ভাইৰেল কৰিছে মাৰ্কিন সংবাদ প্ৰতিষ্ঠানটোৱে।
এই অভিযোগ সন্দৰ্ভত এতিয়াও হোৱাইট হাউছে কোনো প্ৰতিক্ৰিয়া প্ৰকাশ কৰা নাই। আনকি ট্ৰাম্পৰ নিৰ্বাচনী প্ৰচাৰৰ দায়িত্বত থকা সংস্থাবোৰেও কোনো মন্তব্য কৰা নাই।
সেই জনসভাৰ সময়ত ওকলাহোমাত পূৰ্ণ গতিত কোভিড১৯ৰ সংক্ৰমণ ঘটি আছিল।
সেই সভাত অংশগ্ৰহণ কৰা পিছতে ট্ৰাম্পৰ ৮ গৰাকী সংগীৰ শৰীৰত কোভিড১৯ পজিটিভ পোৱা গৈছে। আৰু কেবাজনকো কোৱাৰেন্টাইন কৰা হৈছে।
কোভিড১৯ সংক্ৰমণৰ অব্যাহত থাকোতেও তাত ট্ৰাম্পে নিৰ্বাচনী জনসভা অনুষ্ঠিত কৰাত স্থানীয় স্বাস্থ্য বিষয়াই ট্ৰাম্পক আক্ৰমণ কৰা দেখা গৈছে।