টীয়কৰ চিন্তামণিগড় গাঁও পঞ্চায়তত দুৰ্নীতি: লুন্ঠনৰ ধন ঘূৰাই দিবলৈ বাধ্য হ’ল খণ্ড উন্নয়ন বিষয়াই!

যোৰহাট জিলাৰ টীয়ক সমষ্টিৰ অন্তৰ্গত কলিয়াপানী উন্নয়ন খণ্ডৰ অধীনস্থ ১ নং চিন্তামণিগড় গাঁও পঞ্চায়তত চৰকাৰী বিষয়াই লুন্ঠন চলোৱা উন্নয়নৰ ধন পুনৰ ঘুৰাই দিবলৈ বাধ্য হোৱা এক ঘটনা সংঘটিত হৈছে ।

পঞ্চায়তখনৰ পঞ্চায়ত প্ৰতিনিধিসকলক অন্ধকাৰত ৰাখি দীৰ্ঘদিন ধৰি স্বয়ং খণ্ড উন্নয়ন বিষয়া আৰ সচিবে পঞ্চায়তখনলৈ আৱন্টিত উন্নয়নৰ ধন পঞ্চায়তৰ একাউন্টৰ পৰা উলিয়াই থকাৰ অভিযোগ উঠিছে।

শেহতীয়াকৈ চতুৰ্দশ বিত্তীয় আয়োগৰ অনুমোদিত পুঁজিৰ কমিচনৰ ধনৰ এক লাখ ছয়সত্তৰ হাজাৰ নশ উনত্ৰিশ টকা ১জুলাইৰ পৰা ৫ জুলাইৰ ভিতৰত লেপটপ,ইনভাৰটাৰ,চেনিটাইজাৰ আদি ক্ৰয় কৰাৰ বাবদ আৰু কাৰ্যালয় খৰচৰ বাবদ একাউন্টৰ পৰা মোকলাই নিয়াৰ পাছতো সামগ্ৰী সমূহ ক্ৰয় নকৰাৰ অভিযোগ উত্থাপিত হৈছে ।

কোনো ধৰণৰ সভা অনুষ্ঠিত নকৰি চৰম মইমতালিৰে দুই চৰকাৰী বিষয়া,কৰ্মচাৰীয়ে উন্নয়নৰ ধন আত্মসাৎ কৰাৰ বিষয়ে পঞ্চায়ত সদস্য সকলে অভিযোগ কৰাৰ পাছত তথা আইনী ব্যৱস্থা গ্ৰহণ কৰাৰ হুংকাৰ দিয়াত ভয়ত বিব্ৰত হৈ দীৰ্ঘদিন ধৰি পঞ্চায়ত প্ৰতিনিধিসকলৰ অজ্ঞাতে একাউন্টৰ পৰা মোকলাই নিয়া মুঠ তিনি লাখ উনষাঠি হাজাৰ আশী টকা পুনৰ একাউন্টত জমা কৰি থোৱাৰ আজৱ ঘটনা সংঘটিত হৈছে।

পঞ্চায়ত সদস্যসকলে কৰা অভিযোগ অনুসৰি তেওঁলোকৰ অজ্ঞাতে এই বৃহৎ পৰিমাণৰ ধন খণ্ড উন্নয়ন বিষয়া আৰু সচিবে মিলি উদৰস্থ কৰাৰ অভিসন্ধি ৰচিছিল যদিও এতিয়া বিপদত পৰাৰ ভয়ত এনেদৰে সমুদায় ধন পুনৰ একাউন্টত জমা দিয়ে ।

উল্লেখযোগ্য যে চিন্তামণিগড় গাঁও পঞ্চায়তৰ সভাপতি গৰাকীয়ে শিক্ষক পদত নিযুক্তি লাভ কৰাৰ বাবে সভাপতি পদৰ পৰা অব্যাহতি লোৱাত পঞ্চায়ত খনৰ তত্বাৱধায়কৰ দায়িত্বত আছে খণ্ড উন্নয়ন বিষয়া গৰাকী।
সেয়ে এইসকল চৰকাৰী কৰ্মচাৰীৰ বিৰুদ্ধে উচিত ব্যৱস্থা লবলৈ উৰ্ধতম কৰ্তৃপক্ষক দাবী জনাইছে সদস্যসকলে।