সৰুপেটাত হৃদয় বিদাৰক ঘটনা : গছত চিপ লৈ আত্মহত্যা তৰুণ দম্পতীৰ

বজালী মহকুমাৰ সৰুপেটা আৰক্ষী চকীৰ অন্তৰ্গত বগুলামাৰীত এক হৃদয়বিদাৰক ঘটনা সংঘটিত হৈছে। আজি পুৱা এডাল গছত চিপ লোৱা অৱস্থাত উদ্ধাৰ হৈছে এক তৰুণ দম্পতীৰ মৃতদেহ।

দৰিদ্ৰতা, কৰ্মসংস্থাপন, আৰু সাধাৰণ কাজিয়াৰ পৰিণতিতে আত্মহত্যাৰ দৰে এই মৰ্মান্তিক ঘটনা সংঘটিত হোৱা বুলি জানিব পৰা গৈছে l স্বাভাৱিকতে বিষয়টোক কেন্দ্ৰ কৰি অঞ্চলটোৰ চৌদিশে চৰ্চ্চা অব্যাহত আছে।

সোমবাৰে পুৱাই এইদৰে চিপ লোৱা অৱস্থাত তৰুণ দম্পতী ৰ নিথৰ দেহ উদ্ধাৰৰ ঘটনা প্ৰত্যক্ষ কৰি অঞ্চলটোৰ ৰাইজ মৰ্মাহত হৈ পৰে।

উল্লেখযোগ্য যে প্ৰায় দুবছৰ পূৰ্বে গাঁওখনৰ দৰিদ্ৰ পৰিয়ালৰ ৰতন কলিতা আৰু সমীপৰ নতুন বজাৰ গাঁৱৰ বৰষা দাসৰ মাজত প্ৰেম বিবাহ সম্পন্ন হৈছিল। বিবাহৰ পাছৰে পৰা দুয়ো স্বাভাৱিক জীৱন যাপন কৰি আহিছিল l কিন্তু আচৰিত ভাবে সোমবাৰে পুৱাই গাঁওবাসীয়ে এনে শোকাৱহ ঘটনা প্ৰত্যক্ষ কৰি আচৰিত হৈ পৰে।

জানিব পৰা মতে, ছোৱালীৰ বয়স কম হোৱা বাবে ৰতনৰ পৰিয়ালে বিয়াৰ পিছতো বোৱাৰীৰ পৰিৱৰ্তে নিজৰ ছোৱালীৰ দৰে ৰাখিছিল l কিন্তু কেইদিন মানৰ পৰা দুখীয়া পৰিয়ালৰ ৰতনে ঘৰ এৰি দূৰলৈ কোম্পানীত কাম কৰিবলৈ যাব ওলাইছিল l পত্নী বৰষাক ৰতনে লগত নিব বিচৰা নাছিল যদিও ইয়াৰ বিপৰীতে বৰষা ৰতনৰ লগত একেলগে যাব বিচাৰিছিল।

সেই অনুসাৰে দেওবাৰে দম্পতি হাল ঘৰৰ পৰা একেলগে ওলাই আহিছিল l তাৰ পিছতেই সোমবাৰে পৰিয়ালে দুয়োকে এনে অৱস্থাত প্ৰত্যক্ষ কৰে l অনুমান কৰা মতে, হয়তো এনে বিষয়ক লৈয়েই দুয়োৰে মাজত সাধাৰণ কাজিয়াৰ সূত্ৰপাত ঘটিছিল আৰু তাৰেই পৰিণতিত এনে শোকাৱহ ঘটনা সংঘটিত হ’ল।

ইতিমধ্যে দণ্ডাধীশৰ উপস্থিতিত স্থানীয় আৰক্ষীয়ে মৃতদেহ দুটা মৰণোত্তৰ পৰীক্ষাৰ বাবে বৰপেটা মেডিকেল কলেজলৈ প্ৰেৰণ কৰিছে l আৰক্ষীয়ে এই ঘটনা আত্মহত্যা বুলিয়ে ধাৰণা কৰিছে যদিও অধিক উৎসৰ সন্ধানত তদন্ত অব্যাহত ৰাখিছে l কিন্তু যি নহ’লেও এনে অবাঞ্চিত ঘটনাই সমগ্ৰ অঞ্চলটো জোকাৰি গৈছে।