টিআৰপি কেলেংকাৰী: ৰিপাব্লিক টিভিৰ তিনি কৰ্মচাৰীৰ অগ্ৰিম জামিন মঞ্জুৰ

দেশজুৰি চাঞ্চল্যৰ সৃষ্টি কৰা টিআৰপি কেলেংকাৰীৰ গোচৰত ৰিপাব্লিক টিভিৰ তিনি কৰ্মচাৰীয়ে লাভ কৰিছে অগ্ৰিম জামিন ।

মুম্বাইৰ এখন আদালতে ৰিপাব্লিক টিভিৰ তিনি কৰ্মচাৰীৰ অগ্ৰিম জামিন মঞ্জুৰ কৰে।

জামিন লাভ কৰা তিনি কৰ্মচাৰী হৈছে ক্ৰমে শিৱেন্দু মুলহেলকাৰ,ৰঞ্জিত ৱাল্টাৰ আৰু শিৱসুব্ৰমণিয়ম সুন্দৰম।

তিনিওগৰাকী ব্যক্তিৰে অধিবক্তা বিক্ৰম কামাথে প্ৰকাশ কৰা মতে তেওঁলোকে বিগত বৰ্ষৰ নৱেম্বৰ-ডিচেম্বৰ মাহতে আদালতত জামিনৰ বাবে আবেদন জনাইছিল।

মুম্বাইৰ আদালতৰ অতিৰিক্ত ন্যায়াধীশ এ ডি দেৱে তেওঁলোক তিনিওৰে অগ্ৰিম জামিন মঞ্জুৰ কৰে।

তিনিওগৰাকী ব্যক্তিয়ে আদালতক এইবুলি জনাইছিল যে টিআৰপি কেলেংকাৰীৰ সৈতে তেওঁলোক কোনোপধ্যে জৰিত নহয়।

আনকি তেওঁলোকৰ নামো জাহাৰত উল্লেখ কৰা হোৱা নাই।

টিআৰপি কেলেংকাৰীত ৰিপাব্লিক টিভিৰ মুখ্য সম্পাদক অৰ্ণৱ গোস্বামীৰ নামো সাঙোৰ খাই পৰিছিল।

উল্লেখ্য বিগত বৰ্ষৰ অক্টোৱৰ মাহত টিআৰপি কেলেংকাৰী পোহৰলৈ আহিছিল।

সেই সময়ত ব্ৰডকাষ্ট অডিয়েন্স ৰিছাৰ্চ কাউন্সিলে হানছা ৰিছাৰ্চ গ্ৰুপৰ জৰিয়তে ভুৱা টিআৰপি সন্দৰ্ভত গোচৰ তৰিছিল।

অভিযোগ অনুসৰি দেশৰ বহু কেইটা টিভি চেনেলে ভুৱা টিআৰপি ৰেটিং দেখুৱাইছিল।