জেৰাৰ নামত অভিযুক্তক নিৰ্যাতন : আৰক্ষীক কাৰণ দৰ্শোৱাৰ জাননী আদালতৰ

ধন লুটৰ ঘটনাত জড়িত থকাৰ সন্দেহত গ্ৰেপ্তাৰ কৰা এজন যুৱকক আদালতৰ পৰা আৰক্ষীৰ জিম্মাত লৈ নগাঁও টাউন আৰক্ষীয়ে অকথ্য নিৰ্যাতন কৰাৰ গুৰুতৰ অভিযোগ উত্থাপিত হৈছে।

প্ৰাপ্ত তথ্য মতে, নগাঁও সদৰ আৰক্ষী থানাৰ অন্তৰ্গত ম’হখুলি গাৱঁৰ জুলহাচ আলী নামৰ এজন যুৱকক চুৰি কাৰ্যৰ লগত জৰিত থকাৰ সন্দেহত গ্ৰেপ্তাৰ কৰি আদালতত হাজিৰ কৰোৱাৰ পিছত ২০ জানুৱাৰিৰ পৰা নগাঁও নগৰ শাখাৰ আৰক্ষীয়ে তিনিদিনৰ জিম্মাত লয়।

উক্ত ঘটনাটোৰ তদন্তৰ বাবে যুৱকজনক সোধা পোচাৰ বাবে আৰক্ষীয়ে জিম্মাত লোৱাৰ সময়ছোৱাত নগৰ আৰক্ষীৰ ভাৰপ্ৰাপ্ত বিষয়া বিৰাজ মোহন ডেকাই ধৃত জুলহাচ আলীক অমানুষিক নিৰ্যাতন কৰাৰ অভিযোগ উঠিছে।

আনহাতে, আলীক জেৰাৰ নামত তেওঁৰ গুপ্তাংগত অত্যাধিক আঘাত কৰাৰ ফলত গুপ্তাংগয়েদি ৰক্তক্ষণ আৰম্ভ হৈছে বুলিও ভুক্তভোগী যুৱকজনৰ পৰিয়ালৰ লোকে অভিযোগ কৰিছে। আৰক্ষীৰ এনে নিৰ্যাতনৰ বিৰুদ্ধে সোমবাৰে নগাঁও আদালতত অভিযোগ দাখিল কৰিছে ভুক্তভোগী যুৱকজনৰ পিতৃয়ে।

এই সন্দৰ্ভত আদালতে এক শুনানি গ্ৰহণ কৰি সংশ্লিষ্ট আৰক্ষী বিষয়া গৰাকীক  মঙলবাৰে আদালতত সোঁ শৰীৰে আচামী জুলহাচ আলীসহ হাজিৰ হ’বলৈ নিৰ্দেশ দিয়াৰ লগতে তেওঁক কাৰণ দৰ্শোৱাৰ জাননী জাৰি কৰে।

তদুপৰি, আদালতে আৰক্ষীৰ জিম্মাত থকা আলীৰ স্বাস্থ্য পৰীক্ষা কৰি প্ৰতিবেদন দাখিল কৰিবলৈয়ো  নিৰ্দেশ দিয়ে।