‘চৰকাৰৰ অৰ্থনৈতিক সিদ্ধান্তত ন্যায়ালয়ে হস্তক্ষেপ কৰা উচিত নহয়’; সৰ্বোচ্চ ন্যায়ালয়ক জনালে কেন্দ্ৰই

চৰকাৰৰ অৰ্থনৈতিক সিদ্ধান্তত ন্যায়পালিকাই হস্তক্ষেপ কৰা উচিত নহয়। দেশৰ সৰ্বোচ্চ ন্যায়ালয়ক এইদৰে কয় কেন্দ্ৰ চৰকাৰে।

কেন্দ্ৰই লগতে আৰু কয় যে, ন্যায়ালয়ত মোকৰ্দমা বা শুনানিৰ ওপৰ ভিত্তি কৰি অৰ্থনৈতিক পেকেজো দিয়া নহয়। অৰ্থাৎ অৰ্থনৈতিক নীতি সংক্ৰান্তত কেন্দ্ৰীয় চৰকাৰ ন্যায়াপালিকাৰ ওচৰত জবাবদিহি নহয়।

লকডাউনৰ সময়ত মোৰাটৰিয়াম EMIৰ ওপৰত বিত্তীয় প্ৰতিষ্ঠান সুদ লগোৱা সংক্ৰান্তীয় উচ্চতম ন্যায়ালয়ত বিচাৰাধীন এক গোচৰত শুকুৰবাৰে কেন্দ্ৰীয় চৰকাৰে দাখিল কৰাৰ এক শপতনামাত এইদৰে কয়।

শপতানামত কেন্দ্ৰীয় চৰকাৰে স্পষ্টৰূপত উল্লেখ কৰিছে যে, ‘পৃথক পৃথক ছেক্টৰক নতুনকৈ আৰু অৰ্থনৈতিক সাহায্য দিয়া সম্ভৱ নহয়। আৰু কেন্দ্ৰৰ অৰ্থনৈতিক নীতিত ন্যায়ালয়ে হস্তক্ষেপ কৰাও উচিত নহয়।’

উল্লেখ্য যে মোৰাটৰিয়াম পিৰিয়ড়ৰ EMIৰ সুদৰ সংক্ৰান্তীয় এক গোচৰ কেবা মাহ ধৰি দেশৰ সৰ্বোচ্চ ন্যায়ালয়ত বিচাৰাধীন হৈ আছে।

ছমাহ দিন ধৰি দেশত বলৱৎ হোৱা লকডাউনৰ সময়ত দেশৰ মধ্যবিত্তীয়সকলক আৰ্থিক সকাহ প্ৰদানৰ বাবে কেন্দ্ৰীয় চৰকাৰে ঋণৰ EMI প্ৰদান স্থগিত ৰখাৰ সিদ্ধান্ত লৈছিল।

সেই নিৰ্দেশৰ ভিত্তিতে দেশৰ বিত্তীয় প্ৰতিষ্ঠানসমূহেও EMI সংগ্ৰহৰ কাম স্থগিত ৰাখিছিল।

কিন্তু ইয়াৰ পিছতে বিত্তীয় প্ৰতিষ্ঠানসমূহে মোৰাটৰিয়াম পিৰিয়ডৰ EMIৰ ওপৰত সুদ ধাৰ্য কৰা বুলি অভিযোগ কৰি উচ্চতম ন্যায়ালয়ত আবেদন দাখিল কৰা হয়।

ইয়াৰ পিছতে দেশৰ সৰ্বোচ্চ ন্যায়ালয়ে চৰকাৰৰ লগতে সংশ্লিষ্ট বিত্তীয় প্ৰতিষ্ঠানসমূহক তিৰস্কাৰ কৰাও পৰিলক্ষিত হয়।

এই বিচাৰাধীন গোচৰটোৰ সংক্ৰান্ততে সৰ্বোচ্চ ন্যায়ালয়ে কেন্দ্ৰীয় চৰকাৰ স্থিতি স্পষ্ট কৰিবলৈ নিৰ্দেশ দিছিল। আৰু শুকুৰবাৰে কেন্দ্ৰীয় চৰকাৰে এক শপতনামাৰ যোগে সৰ্বোচ্চ ন্যায়ালয়ক নিজৰ স্থিতি স্পষ্ট কৰি এইদৰে কয়।