বৰপেটাৰ FAAMCHত আৰম্ভ ক’ভিড ৰোগীৰ চিকিৎসা, উপস্থিত স্বাস্থ্য মন্ত্ৰী হিমন্ত বিশ্ব শৰ্মা

বৰপেটাৰ ফকৰুদ্দিন আলী আহমেদ চিকিৎসা মহাবিদ্যালয় হস্পিটালত মঙলবাৰৰ পৰা আৰম্ভ হৈছে ক’ভিড-১৯ পজিটিভ ৰোগীৰ চিকিৎসা।

চিকিৎসালয়খনলৈ অহা স্বাস্থ্য মন্ত্ৰী ড° হিমন্ত বিশ্ব শৰ্মাই এই কথা সদৰী কৰে৷

“আজি বৰপেটা চিকিৎসা মহাবিদ্যালয় হস্পিটালত কোকৰাঝাৰৰ এগৰাকী কোভিড পজিটিভ ৰোগীক ভৰ্তি কৰা হ’ব,” তেওঁ জনায়।

মন্ত্ৰীগৰাকীয়ে লগতে জনাই যে, বৰপেটাৰ চিকিৎসা মহাবিদ্যালয়খনৰ লেবৰেটৰীৰ উন্নতি সাধন কৰা হৈছে৷

“পূৰ্বে দৈনিক ৩৫০টা কোভিড টেষ্ট কৰিব পৰা গৈছিল যদিও এতিয়াৰেপৰা দৈনিক ১৫০০ কোভিড টেষ্ট কৰিব পৰা হ’ব,” তেওঁ কয়৷

বৰপেটা চিকিৎসা মহাবিদ্যালয় হস্পিটালখনত এমাহৰ ভিতৰত আইচিইউ বিচনাৰ সংখ্যা ৫০খনলৈ বৃদ্ধি কৰা হ’ব বুলিও মন্ত্ৰীগৰাকীয়ে ঘোষণা কৰে৷

কোভিড পজিটিভ ৰোগীৰ চিকিৎসাৰ ক্ষেত্ৰত হস্পিটালখনত কোনোক্ষেত্ৰত অভাৱ বা সমস্যা  আছে নেকি তাৰ বুজ লোৱাৰ বাবেই আজি মন্ত্ৰীগৰাকী উপস্থিত হয়।

মন্ত্ৰী শৰ্মাই চিকিৎসা মহাবিদ্যালয় হস্পিটালত উপস্থিত হৈ জিলা প্ৰশাসন আৰু হস্পিটাল কৰ্তৃপক্ষৰ সৈতে আলোচনাত মিলিত হয়৷

মন্ত্ৰীগৰাকীয়ে চিকিৎসা মহাবিদ্যালয়ৰ অধ্যক্ষ ডাঃ ধ্ৰুৱজ্যোতি বৰা, জিলা উপায়ুক্ত মুনীন্দ্ৰ শৰ্মা, আৰক্ষী অধীক্ষক ডাঃ ৰবীন কুমাৰ, হস্পিটালখনৰ অধীক্ষক ডাঃ ববীজিৎ গোস্বামী, হস্পিটালখনৰ কোভিড ১৯ ন’ডেল বিষয়া ডাঃ সুৰেশ শৰ্মাকে ধৰি বিভিন্নজনৰ সৈতে আলোচনাত মিলিত হয়৷

আনহাতে, সাংবাদিকৰ সৈতে হোৱা কথা-বতৰাত মন্ত্ৰীজনে ফাঁচী বজাৰৰ আলু গুডামৰ সংক্ৰমণ শেষ পৰ্যায়ত উপনীত হোৱা বুলি জনায়৷

মন্ত্ৰীগৰাকীয়ে জনায় যে, অসমৰ বাবে ভাল কথা এয়ে যে এতিয়ালৈকে কোৱাৰেন্টাইন হৈ থকা লেকসকলৰ মাজতহে কোভিড সংক্ৰমণৰ ঘটনা হৈ আছে৷

অসমত সামাজিক পৰ্যায়ত এতিয়াও সংক্ৰমণ  হোৱা নাই বুলি উল্লেখ কৰি ইয়াৰ বাবে কোৱাৰেন্টাইনৰ ক্ষেত্ৰত ৰাইজক সহযোগিতা আগবঢ়াবলৈ মন্ত্ৰী শৰ্মাই আহ্বান জনায়।