ত্ৰিপুৰাত ১৫৫ জনলৈ বৃদ্ধি ক’ভিড-১৯ আক্ৰান্ত, পুনৰ বি এছ এফত চিনাক্ত ১

এজন বি এছ এফ বিষয়া মঙলবাৰে ত্ৰিপুৰাত ক’ভিড-১৯ পজিটিভ চিনাক্ত হৈছে আৰু ৰাজ্যখনত মুঠ আক্ৰান্তৰ সংখ্যা ১৫৫লৈ বৃদ্ধি পাইছে।

নতুনকৈ চিনাক্ত হোৱা ক’ভিড-১৯ পজিটিভ ব্যক্তিজনো ঢালাই জিলাৰ আম্বাছাস্থিত বি এছ এফৰ ১৩৮নং বেটেলিয়নৰ।

মুখ্য মন্ত্ৰী বিপ্লব কুমাৰ দেবে টুইটাৰযোগে এই কথা সদৰী কৰিছে।

Today in #COVID19 test among 710 civilians & BSF officials of 138th-Bn, Dhalai Dist, 1 BSF official found COVID-19 POSITIVE.

All COVID-19 patients are under proper medication, team of expert Doctors are taking care of them.

I pray for their speedy recovery#TripuraCOVID19Count

— Biplab Kumar Deb (@BjpBiplab) May 12, 2020

সোমবাৰেও জিলাখনত দুগৰাকী বি এছ এফ বিষয়াক ক’ভিড-১৯ পজিটিভ পোৱা গৈছিল।

দেওবাৰে বি এছ এফ বেটেলিয়নৰ এগৰাকী বিষয়া, ছগৰাকী মহিলা আৰু নটা শিশু ক’ভিড-১৯ পজিটিভ চিনাক্ত হৈছিল।

তাৰ পূৰ্বেও যোৱা সম্পূৰ্ণ সপ্তাহজুৰি ধাৰাবাহিকভাৱে বি এছ এফ বেটেলিয়নকেইটাত ক’ভিড-১৯ পজিটিভ চিনাক্ত হৈ আহিছিল।

মুখ্য মন্ত্ৰী দেবে সদৰী কৰা মতে ত্ৰিপুৰাস্থিত বি এছ এফৰ ৩নং বেটেলিয়নটো ৭৫গৰাকীৰ নমুনা পৰীক্ষা কৰা হৈছিল কিন্তু তেওঁলোক সকলো ক’ভিড-১৯ নিগেটিভ।

ঢালাই জিলাক ইতিমধ্যে ৰেড জ’নৰূপে ঘোষণা কৰা হৈছে।

তাৰোপৰি বি এছ এফৰ ১৩৮নং বেটেলিয়নৰ মুখ্য কাৰ্য্যালয়কে ধৰি গাণ্ডাচেৰা গাঁৱৰ এটা শিৱিৰ আৰু কৰীনা সীমা চকীক কণ্টেইনমেণ্ট জ’ন ঘোষণা কৰা হৈছে।

ৰাজ্যখনত দুগৰাকী ক’ভিড-১৯ আক্ৰান্ত ব্যক্তিয়ে আৰোগ্য লাভ কৰিছে আৰু দুগৰাকীক আন ঠাইলৈ স্থানান্তৰ কৰা হৈছে।