অসম আৰক্ষীত কোভিড-১৯পজিটিভৰ সংখ্যা ২,৯১৭গৰাকীলৈ বৃদ্ধি

অসমত কোভিড-১৯ত আক্ৰান্তৰ সংখ্যা ৭৯,৬৬৭গৰাকীলৈ বৃদ্ধি পোৱাৰ দিনটোতে অসম আৰক্ষীৰ এতিয়ালৈ ২,৯১৭ গৰাকী লোকএই ভাইৰাছৰ দ্বাৰা আক্ৰান্ত হৈছে।

সোমবাৰে অসম আৰক্ষীৰ আইন শৃংখলা শাখাৰ অতিৰিক্ত আৰক্ষী সঞ্চালক প্ৰধান জি পি সিঙে তেওঁৰ টুইটাৰত অসম আৰক্ষীৰ এতিয়ালৈ কিমান লোক কোভিড-১৯ত আক্ৰান্ত হৈছে তাৰ তথ্য দাঙি ধৰি লিখিছে,’’১৭ আগষ্ট,২০২০- অসম আৰক্ষীৰ ২৯১৭গৰাকী লোকৰ পজিটিভ ধৰা পৰিছে।‘’

শীৰ্ষ আৰক্ষী বিষয়াগৰাকীয়ে জনায় যে ৰাজ্যখনত মুঠ আক্ৰান্ত আৰক্ষীৰ লোকসকলৰ ভিতৰত ২,২৫৪গৰাকীয়ে আৰোগ্য লাভ কৰিছে।

আনহাতে, কৰ’না যোদ্ধা হিচাপে কৰ্তব্য পালন কৰা ৮গৰাকী অসম আৰক্ষীৰ লোকে এই মাৰাত্মক ভাইৰাছৰ ফলত প্ৰাণ হেৰুৱাইছে।

‘’দুৰ্ভাগ্যজনকভাৱে, আমি আঠগৰাকী সতীৰ্থক এতিয়ালৈকে হেৰুৱাইছে,’’সিঙে টুইটত কয়।

August 17th 2020 – @assampolice 2917 personnel have tested positive till date. 2254 have recovered. Unfortunately, we’ve lost eight colleagues till date. @DGPAssamPolice @nhm_assam @CMOfficeAssam

— GP Singh (@gpsinghips) August 17, 2020

সোমবাৰে ৰাজ্যখনত পুনৰ ২৭৯২ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে।

দিনটোত পৰীক্ষা কৰা ৪৯৫১০ টা নমুনাৰ ভিতৰত ২৭৯২ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰে।

অসমত বৰ্তমানলৈ মুঠ ৭৯,৬৬৭ গৰাকী লোকৰ শৰীৰত ক’ৰ’না ভাইৰাছৰ উপস্থিতি ধৰা পৰাৰ বিপৰীতে ৫৫,২১৫ গৰাকী লোক চিকিৎসাৰ অন্তত সুস্থ হৈ উঠিছে।

আনহাতে, ৰাজ্যত ১৯৭ গৰাকী লোকৰ ক’ৰ’না ভাইৰাছৰ সংক্ৰমণৰ ফলত মৃত্যু হৈছে।

সোমবাৰে পুনৰ আঠ গৰাকী লোকে বিভিন্ন চিকিৎসালয়ত ক’ৰ’নাৰ স্বীকাৰ হৈ মৃত্যুক আঁকোৱালি লৈছে।

মৃত্যু হোৱা লোক কেইগৰাকী ক্ৰমে তিনিচুকীয়া, দৰং, ডিব্ৰুগড়, কাছাৰ, গোলাঘাট, ওদালগুৰি আৰু কামৰূপ গ্ৰাম্য জিলাৰ।

কাছাৰত দুগৰাকী লোকৰ মৃত্যু হয়। কাছাৰত মৃত্যু হোৱা লোক দুগৰাকী হৈছে ক্ৰমে জিবন ৰয় (৪৫) আৰু মজিবুৰ ইছলাম হাজাৰি (৫৭)।

মৃত্যু হোৱা অন্য লোক কেইগৰাকী হৈছে ক্ৰমে- প্ৰিয়ব্ৰত আচাৰ্য্য (৬৪), উপনে ডেকা (৬০), বনৱাৰী লালা টোডী (৬৯), মতিয়ুৰ ৰহমান (৬৫), জুনা চেত্ৰী (২৪) আৰু সুৰেণ মহন্ত (৭৮)।

আনহাতে, ৰাজ্যত এতিয়ালৈ মুঠ ৫৫,২১৫ গৰাকী লোক চিকিৎসাৰ অন্তত সুস্থ হৈ নিজ গৃহলৈ উভতি গৈছে।

অসমত বৰ্তমান সময়ত বিভিন্ন চিকিৎসালয়ত ২১,৪৬০ গৰাকী ক’ৰ’না আক্ৰান্ত চিকিৎসাধীন হৈ আছে।